Ichki ishlar organlari faoliyatida kinologiya xizmatini rivojlantirish hamda xizmat itlarini maxsus yoʻnalishlar boʻyicha tayyorlash vazifalari yangi bosqichga koʻtarildi
2025-06-27 08:00:00 / Yangiliklar
Soʻnggi yillarda Oʻzbekiston Respublikasi Ichki ishlar vazirligi tashabbusi bilan kinologiya xizmatini tubdan isloh qilish, xizmat itlarini zamonaviy talablarga javob beradigan yoʻnalishlar boʻyicha tayyorlash va ulardan samarali foydalanish borasida bir qator islohotlar amalga oshirilmoqda.
Jumladan, Oʻzbekiston Respublikasi Vazirlar Mahkamasining “Ichki ishlar organlarining kinologiya xizmatlari faoliyatini tubdan takomillashtirish chora-tadbirlari toʻgʻrisida”gi qarori asosida Yashnobod tumani Uysozlar koʻchasida uch gektar yer maydonida, Toshkent shahar IIBB kinologiya xizmati uchun xizmat itlari pitomnigi foydalanishga topshirildi.
Tantanali tadbirda Ichki ishlar vazirligi rahbariyati, soha masʼullari, faxriylar, shuningdek Milliy gvardiya, Mudofaa vazirligi, Bojxona qoʻmitasi, Favqulodda vaziyatlar vazirligi, Davlat xavfsizligi xizmati hamda Prezident davlat xavfsizlik xizmati kinologiya markazlari rahbarlari ishtirok etdilar.
Kinologiya markazi ikki qavatli maʼmuriy bino va qoʻshimcha beshta blokdan iborat. Maʼmuriy binoda navbatchilik qismi, kinolog mutaxassislarning xizmat faoliyati, nazariy mashgʻulotlar oʻtkazish va maxsus vositalarni saqlash uchun xonalar joylashgan. Birinchi blok maxsuslashtirilgan transport vositalarini saqlash uchun moʻljallangan boʻlsa, qolgan bloklarda xizmat itlarini saqlash, parvarishlash, choʻmiltirish, mashgʻulot oʻtkazish, ularga veterinariya xizmatini koʻrsatish uchun alohida volyerlar va boshqa xizmat xonalari joylashgan.
Shuningdek markaz, xizmat itlaridan sifatli nasl olish, ularni giyohvand moddalar va portlovchi buyumlarni topishga tayyorlash, nogiron fuqarolarga koʻmak koʻrsatish va boshqa yoʻnalishlarga ixtisoslashgan boʻlib, bu borada yetakchi mutaxassislar jalb etilgan.
Tadbir ishtirokchilari xalqaro andozalar asosida yangi qurilgan Kinologiya markazining maʼmuriy binosi va u yerda yaratilgan shart sharoitlar, xizmat itlarining ixtisoslashgan yoʻnalishlari hamda ularga tibbiy xizmat koʻrsatish faoliyati bilan tanishdilar.
Mutaxassislar tomonidan yosh xizmat itlarining mashgʻulotlar davomida erishgan natijalari namoyish etildi.
Xizmat itlari nafaqat jamoat tartibni saqlash, balki giyohvand moddalar, portlovchi moddalar, qurol-yarogʻ, inson izlarini topish, qidiruv ishlarida ishtirok etish va hatto inson hayotiga xavf soluvchi vaziyatlarda favqulodda chora koʻrishdek murakkab vazifalarni bajarmoqda. Shu bois, ularni tayyorlash jarayoni ham professional darajada, maxsus reja asosida amalga oshirilayotir.
Shuningdek, mashgʻulot maydonida 10 ta yoʻnalishdagi loyihalar boʻyicha taqdimot qilindi. Ular orasida tajriba tariqasida ilk bora qoʻllanilayotgan ijtimoiy loyihalar ham bor. Unga koʻra kelgusida kinologiya markazida tarbiyalangan xizmat itlari nogiron va imkoniyati cheklangan fuqarolarga xizmat koʻrsatadi va maʼlum bir yoʻnalishda ularni uydan doʻkon yoki dorixonaga borib kelishlarida koʻmaklashishga oʻrgatiladi.
Masʼullarga bu loyihalarni yanada rivojlantirish, chet el tajribasini puxta oʻrganib, amaliyotga yanada mukammal tarzda joriy etish boʻyicha qoʻshimcha topshiriqlar berildi.
Taʼkidlash joizki, Toshkent shahar IIBB Kinologiya xizmati xodimlari mamlakatimiz miqyosida oʻz yoʻnalishda oʻtkazilayotgan turli musobaqa va tanlovlarda yuqori natijalarni qayd etib kelishmoqda. Markazning uch nafar xodimlari huquqni muhofaza qiluvchi idoralar oʻrtasida boʻlib oʻtgan ”Sodiq doʻs -2025” xizmat itlarining koʻrgazmali koʻrik tanlovida jamoalar ichida 1-oʻrinni egallashgan.
Tadbir jarayonida Vatanimiz tinchligi va el-yurt osoyishtaligini taʼminlash yoʻlidagi fidokorona xizmatlari uchun Toshkent shahar IIBB Jamoat tartibini saqlash boshqarmasi Kinologiya faoliyatini tashkil etish boʻlimi boshligʻi podpolkovnik Xolmurod Xoliqulov, Tezkor qidiruv xizmati boʻlim boshligʻi podpolkovnik Yuldoshbek Nikadambayev, Kinologiya boʻlimi kichik instruktor-kinologi safdor Qurbonali Toʻxtasinov, Kinologiya boʻlimi kichik instruktor-kinologi safdor Dilshod Yusupov III darajali “Ichki ishlar organlarida benuqson xizmatlari uchun” koʻkrak nishoni bilan, Toshkent shahar IIBB Moliya va moddiy texnika taʼminoti boshqarmasi boshligʻi polkovnik Xusniddin Shamsutdinov hamda Moliya va moddiy-texnika taʼminoti boshqarmasi boshligʻi oʻrinbosari mayor Rufat Dilmurodov Ichki ishlar vazirligining “Esdalik qoʻl soati” bilan taqdirlandilar, shuningdek Kinologiya boʻlimi 2-son kinologiya boʻlinmasi boshligʻi kapitan Oybek Boymatov va Kinologiya boʻlimi kichik inspektor-kinologi safdor Mexriddin Isoqjonov pul mukofoti bilan ragʻbatlantirildilar.
Yangi foydalanishga topshirilgan markaz nafaqat Ichki ishlar vazirligi balki yurtimizdagi barcha huquqni muhofaza qiluvchi organlar bilan hamkorlikda faoliyat olib boradi hamda jinoyatchilikka qarshi kurashishda xodimlarning eng yaqin koʻmakchisi boʻlgan xizmat itlarini parvarishlashda oʻziga xos maktab sifatida shakllanishi maqsad qilingan.