O‘zbеkiston Rеspublikаsi Ichki ishlаr vаzirligi

Qorovulbozor tumani Buxoro viloyati markazidan 65 kilometr uzoqlikda joylashgan. Tuman tekislik, qumli choʻl va barxanlardan iborat. Hududda yuz ellikdan ortiq sanoat, qishloq xoʻjaligi, qurilish, savdo va umumiy ovqatlanish korxonasi hamda bir qator muassasalar faoliyat koʻrsatadi. Shuningdek, dehqonchilik va chorvachilik borasida ham juda yuksalgan. Bu esa aholi farovonligini oshirmoqda.

Hududda tuman IIB xodimlari tomonidan olib borilayotgan targʻibot-tashviqot ishlari natijasida oldi olinishi lozim boʻlgan jinoyatlar yildan-yilga kamaymoqda. Sodir etilgan jinoyatlarning aksariyati esa «issiq izida» fosh qilinmoqda.

- Hududdagi yettita mahallada turli millat vakillari ahil-inoq istiqomat qilib kelishmoqda, — deydi tuman IIB boshligʻi oʻrinbosari, mayor Nodirbek Valiyev. — Mahallalarda, korxona va tashkilotlarda profilaktik ishlar kuchaytirilib, fuqarolarning muammolari joyida hal etilmoqda. Natijada muqaddam sudlanganlar, ayollar hamda voyaga yetmaganlar tomonidan jinoyatlar sodir etilishiga yoʻl qoʻyilmadi.

Mahallalarda tungi patrullik yoʻlga qoʻyilgani natijasida profilaktika inspektorlari boshqa sohaviy xizmatlar xodimlari bilan birgalikda hududdagi korxona va tashkilotlar qorovullarining faoliyatini tekshirishib, aholi gavjum joylarda va koʻchalarda maqsadsiz yurgan fuqarolarning shaxsiga aniqlik kiritib borishyapti.

Bundan tashqari, mahallalar va maktablarning asosiy kirish-chiqish joylariga, aholi gavjum joylar va koʻchalarga, savdo markazlari hamda bozorlarga 100 taga yaqin videokuzatuv kameralari qoʻyildi. Koʻp qavatli uylarning eshiklariga domofonlar oʻrnatilmoqda. Qolaversa, qoʻriqlash xizmati tomonidan koʻp qavatli va yakka tartibdagi xonadonlar, savdo hamda maishiy xizmat koʻrsatish obyektlari texnik qoʻriqlovga olinmoqda. Ikkita koʻp qavatli uylarning kirish yoʻlaklari oldiga tashvish tugmalari oʻrnatildi. Tuman boʻyicha 29 ta «namunaviy xavfsiz koʻcha» va 18 ta «namunaviy xavfsiz yoʻlak»lar tashkil etildi. Bu ishlarning samarasi oʻlaroq, 7 ta mahalladan ikkitasi «sariq», qolgani «yashil» toifaga kiritilgan.

Tumandagi «Tinchlik» mahallasida 5045 nafar aholi istiqomat qiladi. Mahallada kapitan Ruslan Hamroyev profilaktika katta inspektori lavozimida xizmat faoliyatini boshlagach, huquqbuzarlik sodir etishga moyil shaxslar, xalq tili bilan aytganda, oʻylab qadam bosadigan boʻldi.

- Bizda oʻn ikki millat vakillari yashaydi. Ular bilan til topishishda mahorat kerak boʻladi. Tibbiyotda «Kasalni davolashdan koʻra, uning oldini olgan afzal» degan ibora bor. Profilaktika inspektorimiz ana shu naqlga amal qiladi. Birovning peshonasiga «qamalgan» deb tamgʻa bosilishidan koʻra, uni shu yoʻlga kirishdan saqlab qolishni koʻzlaydi, — deydi mahalla raisi Sarviya Quljonova.

Jamoat tartibini saqlashda profilaktika katta inspektoriga mahalla raisi, xotin-qizlar faoli, hokim yordamchisi, yoshlar yetakchisi, ijtimoiy xodim hamda koʻpni koʻrgan keksalar yaqindan yordam beryapti. Muammolar joyida hal qilinyapti. Bundan tashqari, muqaddam sudlangan, spirtli ichimlikka ruju qoʻygan va jinoyatga moyil shaxslar bilan muntazam ravishda ish olib borishyapti.

Kapitan R.Hamroyevning mahalla faollariga tayanib ish koʻrayotganligi bois birgina «Ayollar daftari»ga kiritilgan 146 nafar xotin-qiz bilan olib borilgan samarali ishlar natijasida hozirgacha 80 foiz ayollar ishga joylashtirildi. Shulardan 12 nafari kasb-hunarga oʻqitildi, 8 tasi doimiy ishga joylashtirildi. Yana 12 nafariga tadbirkorlik boʻyicha imtiyozli kreditlar ajratildi, 40 nafar ehtiyojmand xotin-qizga bir martalik moddiy yordam berildi. Qolaversa, 12 nafar ayolga ham psixologik, ham huquqiy yordam koʻrsatildi.

- Yoshlar tarbiyasi, avvalo, oiladan boshlanmogʻi lozim, deydi tuman IIB JXX HPB Voyaga yetmaganlar masalalari boʻyicha katta inspektor-psixolog, katta leytenant Hurriyat Sultonova. — Xalqimiz «Qush uyasida koʻrganini qiladi», deb topib aytgan. Darhaqiqat, uyida otasi nima ish qilyapti, onasi oʻzini qanday tutyapti bola bularning barchasidan boxabar. Agar kattalar farzandlari komil inson boʻlib voyaga yetishini istashsa, tarbiyada oʻta ehtiyotkor boʻlishi lozim. Biz oilalarda profilaktik ishlar olib borayotganimizda, masalaning shu jihatiga alohida eʼtibor beryapmiz.

Ayni paytda yosh avlodning yozgi taʼtilga chiqqani ichki ishlar organlari xodimlarini yanada masʼuliyatli boʻlishga undaydi. Bolalar nazoratsizligining oldini olish, ular ishtirokida yuz berishi mumkin boʻlgan huquqbuzarliklarga yoʻl qoʻymaslik maqsadida masʼul xodimlar bir qator ishlarni amalga oshiryapti. Xususan, «Dolzarb 90 kun» tadbirlari doirasida bolalarning maroqli dam olishlari uchun umumtaʼlim maktablarida sogʻlomlashtirish maydonchalari tashkil etilgan boʻlib, bu ularning boʻsh vaqtlarini mazmunli oʻtkazishda asqatyapti.

Mirzoqul Ahadov, oʻz muxbirimiz. “Postda”
Buxoro viloyati