O‘zbеkiston Rеspublikаsi Ichki ishlаr vаzirligi

Lavhamiz qahramoni — Andijon viloyati IIB JXX YHXB 6-safarbarlik guruhi YPX inspektori, safdor Sharofiddin Sotvoldiyev bir necha yildan buyon yoʻl-patrul xizmati inspektori vazifasida faoliyat olib boradi. Tabiatan kamtar, kamgap, samimiy. Uning fikricha, inson qoʻlidan keldimi, yaxshilik qilishi kerak.

Xizmat vazifasi davomidagi turfa voqealar, insonlar taqdiri, kutilmagan holatlar hamisha uni oʻylashga, mushohada qilishga chorlaydi.

...Sharofiddin bugun Andijon shahrining Amir Temur koʻchasidagi aeroport chorrahasidagi harakatni tartibga solish uchun masʼul. Bu chorrahada shaharga kiruvchi koʻchalar kesishgani uchun harakat juda tigʻiz. Qatnov bir zum boʻlsa-da, tinmaydi. Kuniga minglab mashinalar Andijon shahriga kiradi va shahardan qoʻshni tumanlarga yoʻl oladi. Qolaversa, bu yerdan temiryoʻl ham oʻtgan.

- Har qanday ob-havo sharoitida, tik oyoqda turib, harakatni nazorat qilish odamni charchatib qoʻymadimi? — soʻradik suhbatdoshimizdan.

- Oʻz kasbini sevgan insonga hech bir vazifa qiyinchilik tugʻdirmaydi, — javob berdi u. — Masalan, men ishimning ogʻir tomonini sezmaganman, aksincha, yoqimli jihatlari koʻp. Deylik, svetofor ishlamay qoldi. Shunday paytda harakatni tartibga solib, mashinalar tiqilinchda qolib ketishining oldini olganingizda, muhim ish bilan shoshayotgan yoʻlovchilarga oʻtib ketishiga yordamlashganingizda, ular minnatdor boʻlsa, bu katta baxt. Ayniqsa, ota-onamiz ortimizdan yaxshi gaplar eshitsa. Kasbimiz orqali yaqinlarimizga olib beradigan rahmatni hech nimaga tenglashtirib boʻlmaydi.

Sharofiddin Sotvoldiyev xizmat taqozosi bilan har kuni koʻplab insonlar bilan muloqotda boʻladi. Unga fuqarolar turli savollar bilan murojaat qilib turishadi. Kimdir yoʻl soʻraydi, kimdir jarimalar haqida savol beradi, yana boshqasi yoʻl harakati bilan bogʻliq yangiliklarni bilgisi keladi. Bunday paytda Sharofiddin bor bilimi, zehnini ishga solib, har bir savolga toʻgʻri va aniq javob berishga harakat qiladi.

Tabiiyki, yoʻl-patrul xizmati xodimlari baʼzan tanqidlarga ham uchrab turadi. Yoʻl harakati qoidalarini buzgan shaxs koʻpincha aybni oʻzidan emas, uni tartibga chaqirgan YPX inspektoridan qidiradi. Unga boʻysunmaslikka urinadi. Sharofiddin har qanday vaziyatda qoidabuzarga bosiqlik bilan munosabatda boʻlishga intiladi. Qoidabuzarligini tan olmay turgan haydovchi tushuntirishlardan keyin vaziyatga toʻgʻri baho beradi va inspektorning eʼtirozini qabul qiladi.

Suhbat orasida Sharofiddin bir voqeani eslab oʻtdi. «Odatdagi ish kunim edi. Bir mashina tezlikda chorrahadan oʻtib keldi. Uni toʻxtatdim. Kabinada yosh bola bor ekan. Haydovchi farzandini shoshilinch shifoxonaga olib ketayotganini aytdi. Uning holatini tushundim va ketishiga ruxsat berdim. Oradan bir qancha vaqt oʻtib, oʻsha odam yonimga kelib, xursand holda minnatdorlik bildirdi. Farzandi tuzalibdi. Oʻshanda shifokorlar 2-3 daqiqaga kech qolganingizda bola nobud boʻlardi, deb aytgan ekan».

...Shu payt poyezd ovozi eshitildi. Sharofiddin darhol chorrahaga yetib borib, vaziyatni tartibga solishga kirishdi. Poyezd oʻtib boʻlgach, tirbandlikni bartaraf etib, xotirjam oʻz joyiga qaytdi. Ha, undagi xotirjamlikda koʻp narsani anglash mumkin edi: kasbiga boʻlgan mehr, faxr va insonlarning mushkulini oson qilishga boʻlgan intilish.

Nigoraxon Toʻxtamatova, oʻz muxbirimiz. “Postda”
Andijon viloyati