Buxoro viloyati hokimi boshchiligidagi masʼul idora rahbarlari ishtirokida ommaviy sayyor qabul oʻtkazildi
2025-06-22 14:15:00 / Yangiliklar
Shofirkon tumanining Temirchi mahallasida joylashgan 24-son umumtaʼlim maktabining Yoshlar bogʻida viloyat hokimi boshchiligidagi masʼul idora rahbarlari ishtirokida ommaviy sayyor qabul oʻtkazildi.
Ushbu qabul davomida fuqarolar tomonidan bildirilgan muammo va murojaatlar alohida-alohida koʻrib chiqildi.
Jumladan, viloyat Ichki ishlar boshqarmasi boshligʻi tomonidan 10 dan ortiq fuqarolarning sud-huquq sohasi hamda ichki ishlar organlari faoliyatiga doir murojaatlari tinglandi.
Asosiy eʼtibor aholining huquqiy savodxonligini oshirish, surishtiruv, tergovga qadar tekshiruv va dastlabki tergov jarayonlarida yuzaga kelayotgan muammolarni bartaraf etish, shuningdek, tizimda kuzatilayotgan kamchiliklarni oʻrganish hamda tegishli choralar koʻrishga qaratildi.
Qoʻshimcha oʻrganishni talab etgan murojaatlar ish yurituviga olinib, ijrosi yuzasidan manzilli chora-tadbirlar belgilandi.
Ichki ishlar organlari rahbarlarining bunday sayyor qabullari tasdiqlangan grafik asosida oʻtkazib borilishi belgilangan boʻlib, vaqti va joyi toʻgʻrisida viloyat Ichki ishlar boshqarmasining rasmiy axborot platformalari orqali aholiga oʻz vaqtida maʼlumot berib boriladi.
Buxoro viloyati IIB Axborot xizmati