Respublika ishchi guruhi tomonidan Prezident qarori ijrosi doirasida Surxondaryo viloyatida oʻquv-amaliy seminar tashkil etildi
2025-06-21 09:00:00 / Yangiliklar
Bosh prokurorning birinchi oʻrinbosari B.Valiyev rahbarligidagi ishchi guruh tomonidan Prezidentning 2025-yil 3-yanvar kunidagi PQ-1-son qarori ijrosi doirasida Surxondaryo viloyatining Termiz tumanida oʻquv-amaliy seminari tashkil etildi.
Unda, viloyat prokurori B.Babadjanov, viloyat IIB boshligʻi oʻrinbosari X.N.Atanazarov va masʼul tarmoq xodimlari, prokuraturalari tergovchilari, viloyat IIB tergovchilari, ekspert kriminalistika markazi xodimlari, Respublika sud -tibbiy ekspertiza ilmiy — amaliy Markazi viloyat filiali mutaxassislari ishtirok etishdi.
Tergov sifatini oshirishda muhim ahamiyat kasb etgan ushbu oʻquv-amaliy seminarida — “Tergovga qadar tekshiruv va jinoyat ishlarini tergov qilishda axborot tizimlari imkoniyatlaridan foydalanish, elektron dalillarni aniqlash, toʻplash, rasmiylashtirish va ekspertiza oʻtkazish”, “ Koʻp epizodli, murakkab qotillik jinoyatlarini tergov qilishning oʻziga xos xususiyatlari”, “Axborot texnologiyalaridan foydalangan holda sodir etilgan jinoyatlar (kiberjinoyatlar)ni fosh etishning oʻziga xos xususiyatlari”, “Giyohvandlik vositalari va psixotrop moddalari kuchli taʼsir qiluvchi dori vositalari noqonuniy muomalasi bilan bogʻliq jinoyatlar yuzasidan tergov harakatlari oʻtkazishning oʻziga xos jihatlari”, “Yoʻl transport hodisasi bilan bogʻliq holatlar yuzasidan koʻzdan kechirish, dalillarni toʻplash va tegishli ekspertizalarni tayinlashda yoʻl qoʻyilayotgan muammolar”, “Dron orqali jinoyatlarni aniqlash va koʻzdan kechirish tergov harakatini oʻtkazish”, “Suvdan murdalar topilganligi holatlari yuzasidan hodisa joyini koʻzdan kechirish va boshqa tergov harakatlari oʻtkazishning oʻziga xos xususiyatlari”, “Oʻz joniga qasd qilish holatlari boʻyicha hodisa joyini koʻzdan kechirish, dalillarni rasmiylashtirib olish hamda ekspertiza tekshiruvi uchun taqdim etish tartibi” kabi dolzarb mavzularda malakali mutaxassislarning maʼruzalari tinglandi.
Yakunida, faoliyati davomida oʻz xizmat vazifalarini vijdonan bajargan, tergov sifatini oshirish, jinoyat ishlari boʻyicha yetkazilgan moddiy zararlarni undirishda alohida tashabbus koʻrsatgan bir guruh tergov xodimlar huquqiy adabiyotlar toʻplami, faxriy yorliq va pul mukofotlari bilan munosib taqdirlandi.
Surxondaryo viloyati IIB Axborot xizmati