Ichki ishlar organlarida genderga oid audit boʻyicha seminar-trening tashkil etildi
2025-06-20 19:10:00 / Yangiliklar
Oʻzbekiston Respublikasi Ichki ishlar vazirligi markaziy apparati hamda uning tarkibiy va hududiy boʻlinmalari ishtirokida “Genderga oid audit: tamoyillar va oʻtkazish tartibi” mavzusida seminar-trening boʻlib oʻtdi.
Mazkur tadbir Oʻzbekiston Respublikasi Oliy Majlisi Senatining 2025-yil 18-martdagi SQ-102-V-sonli Qarori bilan tasdiqlangan “2030-yilga qadar Oʻzbekiston Respublikasida gender tenglikka erishish strategiyasi”ni 2025-yilda amalga oshirish boʻyicha kompleks chora-tadbirlar dasturining 63-bandi ijrosini taʼminlash doirasida tashkil etildi. Ushbu treningning asosiy maqsadi – vazirlik va idoralarda gender auditi jarayonini samarali tashkil etish hamda bu yoʻnalishdagi faoliyatga boʻlgan eʼtibor va manfaatdorlikni yanada oshirishdan iboratdir.
Trening videoselektor shaklida oʻtkazilib, unda mamlakatimizda gender tenglikni taʼminlash boʻyicha olib borilayotgan ishlar, mavjud huquqiy-meʼyoriy hujjatlar, ilgʻor tajribalar, shuningdek, ushbu sohadagi muammolar va ularni bartaraf etish yoʻllari atroflicha muhokama qilindi.
Tadbirda ishtirokchilarga gender auditi tushunchasi, uning asosiy tamoyillari va oʻtkazilish tartibi haqida batafsil maʼlumotlar berildi. Shu bilan birga, gender tenglikni taʼminlashda ichki ishlar organlarining imkoniyatlari va bu boradagi kelgusidagi vazifalar yuzasidan fikr almashildi.
Seminar-treningda Ichki ishlar vazirligi Akademiyasi, Jazoni ijro etish departamenti, Toshkent shahar va Toshkent viloyati IIBB, Transport va turizm obyektlarida xavfsizlikni taʼminlash departamenti, Qorovul Qoʻshinlari Qoʻmondonligi, 1 va 2-son Akademik litseylar, hududiy IIBlar hamda kasaba uyushmalari vakillari ishtirok etdilar.
Trening davomida ishtirokchilar gender auditi jarayonining mazmun-mohiyati, amalga oshirish mexanizmlari va ushbu sohadagi ilgʻor tajribalar bilan tanishtirildi. Ular oʻzaro tajriba almashish, taklif va tavsiyalar bildirish imkoniga ega boʻlishdi.
Mazkur seminar-trening Oila va gender ilmiy-tadqiqot instituti ilmiy xodimi Saidvaliyeva Xurshida Xojiakbarovna tomonidan olib borilib, gender tenglik masalalarining nazariy va amaliy jihatlari ishtirokchilarga keng yoritib berildi.