Qoraqalpogʻiston Respublikasi. Maqsad — xavfsizlikni taʼminlash
2025-06-20 16:10:00 / Yangiliklar
Qoraqalpogʻiston Respublikasi Transportda xavfsizlikni taʼminlash boshqarmasi tomonidan biriktirilgan hududlarda yoʻlovchilar xavfsizligini taʼminlash, ularning huquq va manfaatlarini himoya qilish, shuningdek, jinoyatchilikka qarshi kurashish, huquqbuzarliklarning barvaqt oldini olish va jamoat tartibini saqlashda mavjud imkoniyatlardan samarali foydalanib kelinmoqda.
Taʼkidlash joizki, boshqarma xizmat koʻrsatish hududining umumiy uzunligi 1028 kilometrni tashkil etib, uning tasarrufida Qoraqalpogʻiston, Boʻston, Xoʻjayli, Nukus, Miskin boʻlinmalari, shuningdek, Nukus xalqaro aeroportida xavfsizlikni taʼminlash boʻlinmasi mavjud.
- Joriy yilning 5 oyi davomida olib borilgan ishlar natijasida 18 ta jinoiy holat aniqlandi. Jinoyat qidiruv sohasi boʻyicha 10 tadan 9 taga, iqtisodiy jinoyatlar 8 tadan 6 taga kamayishiga erishildi. Albatta, jinoyatlar sonining kamaygani ijobiy holat, lekin biz bu bilan cheklanib qolmaymiz, — deydi boshqarma boshligʻi, mayor Akmal Abdirahmonov.
Huquqbuzarlik va jinoyatchilikning oldini olishda profilaktik ishlar muhim ahamiyatga ega. Shu bois boshqarmaga qarashli hududlarda xodimlar tomonidan «Huquqbuzarliklar profilaktikasi kuni», «Temiryoʻllarda xavfsiz kun», «Qoradori», «Dori-darmon», «Tun» va «Qidiruv» kabi tadbirlar muntazam ravishda oʻtkazib kelinadi. Ushbu tadbirlar doirasida hududlar xavfsizligini taʼminlash, huquqbuzarliklarning barvaqt oldini olish, temiryoʻl inshootlariga shikast yetkazmaslik kabi koʻplab yoʻnalishlar boʻyicha profilaktik-tushuntirish ishlari amalga oshirib borilmoqda.
Azamat Pirniyazov, oʻz muxbirimiz. “Postda”