O‘zbеkiston Rеspublikаsi Ichki ishlаr vаzirligi

Oʻshanda hayotimni oʻzgartirib yuborgan voqea sodir boʻldi. Kechga yaqin oʻgʻlim IIV Akademiyasi kursantlari formasini kiyib qarshimda paydo boʻldi. Qoʻlida bir parcha qogʻoz.

Bu Sevdiyor Abdunazarovni kursantlikka qabul qilish toʻgʻrisidagi buyruqdan nusxa edi.

Men uchun dunyo charogʻon boʻlib ketdi. Goʻyo yulduzlar atrofimda parvona boʻlayotgandek edi. Angladimki, har bir inson uchun farzandi kamolidan koʻra ulugʻ baxt yoʻq ekan. Shu oniy lahzalarda uning taʼlim-tarbiyasi yoʻlida chekkan mashaqqatlarimiz koʻz oʻngimdan bir-bir oʻtdi.

Sevdiyor juda yoshligidan zehnli ekanini namoyish qildi. U bogʻchadaligidayoq sheʼrlarni tez yodlab olar, ayniqsa, ertaklarni aniq eslab qolardi. Oʻsha paytlarda Sirdaryo IESda ishlar, unga kam vaqt ajratardim. Keyinchalik ishim yana taʼlim tizimiga qaytgach, tobora oʻsib borayotgan farzandimning tarbiyasi, bilim olishi hayotimning eng ustuvor vazifalaridan biriga aylandi.

U bilan ishdan qaytgach shugʻullana boshladim. Ulgʻaygani sari tushunchasi kengayib, intilishlari kuchaydi. oʻsmirlik davrida uni kitobga oshno qilib qoʻydim.

Oʻsha paytda shahar Axborot-kutubxona markaziga birga borib kitob tanlashga yordam berganlarim esimda bor. U badiiy kitoblarni gʻoyat sevardi.

Ayniqsa, jahon adabiyoti uni qattiq qiziqtirib qoʻydi. Men esa unga ensiklopedik, ilmiy kitoblarni ham tavsiya qila boshladim. Shu tariqa oʻgʻlim axborot texnologiyalari, nanoolam, fizika, biologiyaga oid bilim va dunyoqarashini kengaytira boshladi.

Yillar oʻtgan sari unda ichki ishlar organi xodimi boʻlishga boʻlgan qiziqish kuchayadi. Tushundimki, u hayot yoʻliga oid tanlovni qilib boʻlgan. Shu tariqa huquq, tarix fanlarini chuqur oʻrganishga kirishib ketdi.

Repetitorga qatnay boshladi. Lekin aslo kitobxonlikni tashlab qoʻymadi. IIV Akademiyasidagi kursantlik davrida ham uning mutolaaga boʻlgan ishtiyoqi aslo soʻnmadi.

Mana, hozir Guliston shahar IIB huzuridagi Tergov boʻlimi katta tergovchisi vazifasida ishlaydi. Ikki yildirki, viloyatdagi hamkasblari orasida “Eng yaxshi kitobxon xodim” deb topilmoqda.

Eʼtiborli jihati, uning rahbarlari tez-tez qoʻngʻiroq qilib, mana shunday farzandni tarbiyalab berganim uchun menga minnatdorlik bildirishadi.

Men esa ularga oʻgʻlimning maʼnaviyati, axloqi, insoniy fazilatlari aynan kitobxonlik orqali shakllanganini taʼkidlayman. Va har doim yosh shogirdlarimga kitob inson uchun ota-onadan keyin eng yaqin doʻst, ustoz ekanini taʼkidlab kelaman.

Zotan, bunga oʻz farzandim kamoli misolida amin boʻlganman.

©️ “Postda” gazetasi, Oyzoda Egamberdiyeva, Shirin shahridagi 2-umumtaʼlim maktabi direktori oʻrinbosari.