O‘zbеkiston Rеspublikаsi Ichki ishlаr vаzirligi

Jinoyat sodir etildi. Uni kim, qanday holatda, qachon va qay yoʻsinda sodir etgan? Bu kabi savollarga javob topishda tergov-tezkor guruhi tarkibidagi ekspert-kriminalistning koʻmagi juda asqatadi. Soha vakillari har qanday murakkab va chigal vaziyatda oʻz bilimi, tajribasiga tayangan holda, ziyraklik bilan voqea joyini koʻzdan kechirib, tilsimlarni ochishga muvaffaq boʻlishadi.

Bu borada Buxoro viloyati IIB EKM xodimlari tomonidan joriy yilning oʻtgan oylari davomida 1300 martadan koʻproq voqea joyi koʻzdan kechirilib, tergov harakatlarida mutaxassis sifatida ishtirok etildi. Hodisa joylarining 1157 tasidan 1400 ta ashyoviy dalil va izlar olinib, tergov organlariga taqdim qilindi.

Markaz va uning quyi tizim xodimlari tomonidan 5 oy davomida tergov va surishtiruv organlarining qarorlariga asosan, 2355 ta ekspertiza xulosasi bajarildi. Shulardan 112 ta daktiloskopik, 50 ta trasologik, 83 ta ballistik, 145 ta xatshunoslik, 142 ta hujjatlarning texnik-kriminalistik ekspertizasi, 309 ta giyohvandlik vositalari hamda 88 ta maxsus kimyoviy moddalar ekspertizasi, 771 ta sovuq qurollar ekspertizasi, 2 tadan gazli qurollar va elektroshok qurilmalari ekspertiza turlari tadqiqotlari oʻtkazildi.

Bundan tashqari, markazdagi mavjud avtomatlashtirilgan tizim bazasini boyitish, jinoyatlarni qoʻl-barmoq izlari yordamida fosh etish samaradorligini yanada oshirish maqsadida JQB, HPB, M va FR hamda tergov xizmatlarining oʻzaro hamkorligini yoʻlga qoʻyib, profilaktik roʻyxatda turuvchi, muqaddam sudlangan, jinoyat sodir etishga moyil va boshqa toifadagi shaxslar daktiloskopik kartalarining bazaga kiritib borilishi taʼminlanmoqda. Oʻtgan davr mobaynida mazkur bazaga 877 ta daktokarta joylashtirildi. Hozirgi kunga qadar mazkur dastur bazasiga viloyatimiz hududiga yakka tartibdagi mehnat faoliyati bilan shugʻullanish uchun boshqa viloyatlardan kelgan, Rossiya Federatsiyasi va boshqa davlatlarga ketayotgan, deportatsiya qilingan, Vatanga qaytish guvohnomasi bilan qaytganlar, fuqarolik pasportini yoʻqotgan, shuningdek, profilaktik roʻyxatda turuvchi, muqaddam sudlangan, uzoq muddatga respublika hududidan chiqib ketgan shaxslarning 521320 ta daktokartasi kiritildi.

Qoʻl-barmoq izlari yordamida 31 ta jinoyat fosh etildi, 7 ta shaxsi nomaʼlum murdaning shaxsi aniqlandi. Shuningdek, jinoyat va huquqbuzarliklar yuzasidan 42 ta tayinlangan yozma topshiriq asosida shaxsni tashqi qiyofa boʻyicha identifikatsiya qilish bazasi orqali taqdim etilgan videotasvir va fotosuratlardagi shaxslarning shaxsiga aniqlik kiritildi.

Erkin Rajabov, podpolkovnik. “Postda”