O‘zbеkiston Rеspublikаsi Ichki ishlаr vаzirligi

Ichki ishlar organlarida “Maʼnaviyat va maʼrifat darsi” doirasida “Jadidlar jasorati – ibrat maktabi” mavzusida maʼrifiy tadbir boʻlib oʻtdi. Milliy tariximizning ogʻriqli, ammo ibratli sahifalarini yoritish, Vatan ravnaqi yoʻlida jon fido etgan ajdodlarimiz jasoratini eslash har bir vatan posbonining burchidir.

Tadbirda maʼruza qilish uchun Oʻzbekiston Respublikasi Vazirlar Mahkamasi huzuridagi Qatagʻon qurbonlari xotirasi davlat muzeyi bosh ilmiy xodimi, tarix fanlari boʻyicha falsafa doktori Bahrom Irzayev taklif etildi. U oʻz maʼruzasida XX asr boshlarida yurtimizda milliy uygʻonish, jamiyatni isloh qilish va maʼrifat tarqatish uchun kurashgan jadidlar harakatining ahamiyati, ularning jasorati va qatagʻon yillaridagi fojiali taqdiri haqida atroflicha toʻxtalib oʻtdi.

Tadbirda Qorovul qoʻshinlari qoʻmondonligi Jismoniy va jangovar tayyorgarlikni tashkil etish boʻlimi boshligʻi podpolkovnik Akmal Maxkamov soʻzga chiqib, yigʻilish ishtirokchilariga Oʻzbekiston Respublikasi Prezidentining PF-23-son Farmoni mazmun-mohiyati yuzasidan batafsil tushuntirish berib oʻtdi. U Prezident farmonida belgilab berilgan ustuvor vazifalar, islohotlar mazmuni va ularni hayotga tatbiq etishda har bir xodimning masʼuliyati haqida soʻz yuritdi.

Tadbir yakunida yuksak ruhdagi yana bir voqea – ichki ishlar vazirligi terma jamoasi sharafini himoya qilib, ommaviy yugurish marafonida gʻoliblikka erishgan bir guruh xodimlar hamda sportning sambo va jangovar sambo turlari boʻyicha nufuzli “Osiyo va Okeaniya” xalqaro turnirida gʻolib boʻlgan xodimlar mukofotlar bilan taqdirlandi. Ichki ishlar vazirining tegishli buyrugʻiga asosan berilgan ushbu mukofotlar ularning halol xizmatini munosib eʼtirof etish sifatida xizmat qildi.

Bunday maʼrifiy tadbirlar xodimlarning maʼnaviy olamini boyitish, tarixiy xotirani tiklash va xizmatga boʻlgan masʼuliyatini yanada mustahkamlashda muhim oʻrin tutadi.