Andijon shahrida sodir etilgan jinoyatga sabab boʻlgan omillar keng jamoatchilik ishtirokida tanqidiy muhokama qilindi
2025-06-14 12:00:00 / Yangiliklar
Andijon viloyati prokurori Murodillo Abduhakimov hamda Ichki ishlar boshqarmasi boshligʻi Sanjar Djabarovlar raisligida boʻlib oʻtgan muhokamada Andijon shahri hokimi, huquq-tartibot organlari rahbarlari, tashkilot-muassasalar masʼullari, “mahalla yettiligi” aʼzolari hamda keng jamoatchilik vakillari ishtirok etdi.
Tadbir avvalida, ikki nafar haydovchining avtomashina qoʻyish uchun joy talashib, janjallashib ketishi oqibatida biri ikkinchisiga tigʻli jism orqali tan jarohati yetkazganligi holati yigʻilganlarga maʼlum qilinib, ushbu jinoyatning kelib chiqishiga shart-sharoit yaratgan omillar tub ildizigacha tahlillar asosida tanqidiy muhokama qilindi.
Shuningdek, Andijon shahrida “Tigʻ” profilaktik tadbirlari sust darajada oʻtkazilayotganligi, bunga masʼul boʻlganlar tomonidan ish talab darajasida tashkil etilmaganligi ham tanqid ostiga olinib, bu boradagi targʻibot ishlarini kuchaytirish boʻyicha aniq vazifalar belgilab berildi.
Muhokama yigʻilishida “mahalla yettiligi” aʼzolari va boshqa masʼullar tomonidan ushbu sodir etilgan ayanchli holatdan oʻzlariga yetarlicha xulosa chiqargan holda kelgusida bunday jinoyatlarga yoʻl qoʻymaslik boʻyicha fikr-mulohazalar bildirildi.
Tadbir yakunida kelgusida bu kabi salbiy holatlarga yoʻl qoʻymaslik borasida tegishli mutasaddilarga muhim chora-tadbirlar belgilab berildi.
Andijon viloyati IIB Axborot xizmati