Andijon tumanida sodir etilgan jinoyat sabablari viloyat prokurori hamda viloyat IIB boshligʻi tomonidan keng jamoatchilik ishtirokida tanqidiy muhokama qilindi
2025-06-13 23:50:00 / Yangiliklar
Andijon tumanining Jannatmonand mahallasi hududida sodir etilgan ogʻir turdagi jinoyatning kelib chiqish sabablari, jamiyatdagi ijtimoiy-ruhiy muhitga taʼsiri hamda profilaktik chora-tadbirlarning samaradorligi masalalari boʻyicha viloyat prokuraturasi va viloyat ichki ishlar boshqarmasi rahbariyati tomonidan tanqidiy muhokama tashkil etildi.
Muhokama yigʻilishida Andijon viloyati prokurori Murodillo Abduhakimov hamda Ichki ishlar boshqarmasi boshligʻi Sanjar Djabarovlar ishtirok etib, jinoyat sodir boʻlishiga olib kelgan omillar — oilaviy nizolar, jamiyatdagi beeʼtiborlik, profilaktik tadbirlar samarasizligi va muayyan mutasaddi organlar faoliyatidagi kamchiliklar aniq faktlar asosida tanqidiy koʻrib chiqildi.
Muhokama davomida jinoyatning oldini olish imkoni boʻlgani, lekin masalaga masʼul shaxslar oʻz vaqtida zarur choralarni koʻrmagani keskin tanqid ostiga olinib, mahalla, taʼlim muassasalari, fuqarolik jamiyati institutlari va huquqni muhofaza qiluvchi organlar oʻrtasida hamkorlikni mustahkamlash, erta ogohlantirish va jinoyatga moyil fuqarolar bilan individual ishlashning ahamiyatiga alohida eʼtibor qaratildi.
Shuningdek, ota-onalar farzandlarini yonida tigʻli buyumlar olib yurishiga yoʻl qoʻymasligi, buning oqibati ayanchli yakun topishi mumkinligi hayotiy voqeliklar yordamida aytib oʻtildi.
Bundan tashqari mahalla vakillari tomonidan jinoyatchilik va huquqbuzarliklarni oldini olishga oid bildirilgan masalalar ham tinglanib, ularni hal etish boʻyicha aniq chora- tadbirlar belgilandi.
Tadbir yakunida barcha mutasaddilarga aniq topshiriq va vazifalar yuklatildi.
Andijon viloyati IIB Axborot xizmati