O‘zbеkiston Rеspublikаsi Ichki ishlаr vаzirligi

Avval xabar qilinganidek, IIV akademiyasida Xitoy Jamoat xavfsizligi universiteti talabalari uchun oʻquv kursi tashkil qilingan edi.

Oʻquv dasturi asosida taʼlim muassasasi professor-oʻqituvchilari tomonidan jamoat tartibi va xavfsizligini taʼminlash, terrorizm, ekstremizm, odam savdosi, kiberjinoyatchilik va boshqa xavf-xatarlarga qarshi kurashish, huquqni muhofaza qiluvchi organlar faoliyatini samarali tashkil qilish kabi yoʻnalishlarda mashgʻulotlar oʻtkazildi.

Bundan tashqari, universitet vakillari yurtimiz tarixi, mamlakatimizda amalga oshirilayotgan keng koʻlamli islohotlar, taraqqiyot strategiyamizda belgilab berilgan ustuvor vazifalarning mazmun-mohiyati yoritilgan maʼruzalar tingladilar. Shu bilan birga, turli madaniy-maʼrifiy tadbirlar hamda yurtimizning diqqatga sazovor maskanlariga sayohatlar uyushtirildi.

Oʻquv kursi yakuni munosabati bilan boʻlib oʻtgan tadbirda delegatsiya rahbari Jang Jou soʻz olib, hozirgi global sharoitda tajriba almashinuvini kengaytirish muhimligini taʼkidladi.

«Qisqa vaqt mobaynida oʻzimiz uchun koʻp jihatlarni oldik.

Oʻzbekistonlik hamkasblarimiz bilan samimiy muloqot qilib, yutuqlarimiz haqida fikr almashdik. Aytishim joizki, akademiya faoliyati bilan tanishish chogʻida oʻziga xos yondashuvlarga guvoh boʻldim.

Avvalo, taʼlim jarayonida nazariya va amaliyot uygʻunligiga ustuvor ahamiyat qaratilmoqda.

Kursantlar bilan olib borilayotgan vatanparvarlik tarbiyasi buyuk allomalarning ibratli hayoti va boy merosiga tayanilgan holda amalga oshirilmoqda.

Bundan tashqari, taʼlim sifatini oshirish maqsadida professor-oʻqituvchilarning dars mashgʻulotlarini monitoring qilib borish yoʻlga qoʻyilgan. Albatta, bular zamonaviy taʼlimning muhim xususiyatlari sanaladi», – dedi u.

Akademiya boshligʻi Rustam Xatamov paritet asosida amalga oshirilayotgan qoʻshma dasturlar ikki mamlakat yoshlari uchun ulkan imkoniyat yaratayotganini eʼtirof etib, shunday dedi:

«Taʼlim muassasalarimiz oʻrtasidagi hamkorlik aloqalari izchil rivojlanib bormoqda. Oʻtgan davr mobaynida dolzarb mavzularga qaratilgan malaka oshirish kurslari, mahorat darslari tashkil qilindi.

Muhimi, tajriba almashish borasida samarali tizim yoʻlga qoʻyildi. Bugungi axborot texnologiyalari davrida innovatsion yutuqlarni oʻrganish va ilgʻor yondashuvlarni amaliyotga joriy etish strategik omil sanaladi.

Shu bois, hamkorlik aloqalarini yanada kengaytirish va yangi formatlarda davom ettirish manfaatlarimizga xizmat qiladi».

Tadbirda Xitoy Xalq Respublikasining mamlakatimizdagi elchixonasi maslahatchisi Chen Yuy soʻz olib, koʻp qirrali aloqalarning yangi zamon ruhiga mos ravishda mustahkamlanib borayotgani uzoq muddatli strategik hamkorlik samarasi ekanligini taʼkidlab oʻtdi.

Shundan soʻng universitet vakillariga sertifikatlar topshirildi.

IIV Akademiyasi Axborot xizmati