Abdumalik Xalakov Niderlandiya davlatida sportning boks turi boʻyicha oʻtkazilgan “Eyndxoven kubogi” xalqaro turniri gʻolibi boʻldi
2025-06-11 18:25:00 / Yangiliklar
Joriy yilning 6-9-iyun kunlari Niderlandiya davlatida sportning boks turi boʻyicha “Eyndxoven kubogi” xalqaro turniri oʻtkazildi. Musobaqada 28 ta davlatdan 179 nafar sportchilar ishtirok etib, 18 ta vazn toifasida oʻzaro bellashdi.
Boks turnirida Oʻzbekiston terma jamoasi tarkibida 3 nafar sportchilar munosib ishtirok etib, 2 ta oltin 1 ta kumush medalni qoʻlga kiritdi.
Quvonarlisi gʻoliblar orasida Ichki ishlar xodimi olimpiada chempioni Abdumalik Xalakov ham bor. 60 kg vazn toifasida ringga koʻtarilgan Toshkent shahar IIBB xodimi, katta leytenant Abdumalik Xalakov oltin medal sohibi boʻldi. Finalda angliyalik bokschi Jek Diranga qarshi bahs olib borgan Abdumalik hakamlar qarori bilan gʻolib deb topildi. Shu bilan birga unga ushbu musobaqaning “Eng yaxshi bokschisi” sovrini ham topshirildi.
Tantanali tarzda kutib olingan safdoshimiz oʻz taassurotlari va gʻalabali onlaridagi his tuygʻularini hamkasblari bilan ham boʻlishdi. Ichki ishlar vazirligi nomidan chempionimizga oldinda turgan muhim bahslarda muvaffaqiyat tilib qolamiz.