Buxoro viloyat hokimligida navbatdagi haftanoma ishchi yigʻilishi boʻlib oʻtdi
2025-06-10 10:00:00 / Yangiliklar
Buxoro viloyat hokimi rahbarligida oʻtkazilgan yigʻilishda viloyat prokurori, Ichki ishlar boshqarmasi boshligʻi, huquq-tartibot idoralari, tegishli davlat va nodavlat tashkilotlari hamda korxonalarning masʼul rahbarlari ishtirok etdilar.
Yigʻilish kun tartibidagi asosiy masala — viloyatdagi jinoyatchilik holati, huquqbuzarliklar va profilaktik tadbirlar samaradorligini oshirish, shuningdek, davlat rahbari tomonidan belgilangan ustuvor vazifalar ijrosini taʼminlash boʻyicha manzilli ishlar va dolzarb vazifalarni belgilab olishdan iborat boʻldi.
Dastlab, 2025-yilning 5 oyi davomida Buxoro viloyatida qayd etilgan jinoyatlar hududlar kesimida tanqidiy muhokama qilinib, mutasaddilar zimmasiga aniq vazifalar yuklatildi.
Yigʻilishning navbatdagi dolzarb masalasi — Oʻzbekiston Respublikasi Prezidentining 2025-yil 3-yanvardagi PQ-1-sonli “2025-yilda Respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish chora-tadbirlari toʻgʻrisida“gi Qaror ijrosini taʼminlash masalasi boʻldi. Mazkur Qaror doirasida mahallalarda yettilik vakillarining faoliyatini tubdan oʻzgartirish, jamoatchilik bilan hamkorlikni yoʻlga qoʻyish, “mahallabay“ ishlash tizimini joriy etish hamda hududiy xavfsizlikni taʼminlash borasida belgilangan choralar muhokama qilindi.
Shundan soʻng, Oʻzbekiston Respublikasi Vazirlar Mahkamasining “Obod va xavfsiz mahalla” tamoyili asosida mahallalarda ijtimoiy profilaktika tizimini rivojlantirish toʻgʻrisidagi 801-sonli Qarori ijrosi doirasida amalga oshirilayotgan ishlar va yoʻl qoʻyib kelinayotgan tizimli kamchiliklar tanqidiy koʻrib chiqildi. Bu qarorga asosan, har bir mahallada kriminogen vaziyatni barqarorlashtirish, profilaktik tadbirlarning natijadorligini oshirish, huquqbuzarliklarning barvaqt oldini olish maqsadida amalga oshirilayotgan ijtimoiy profilaktik ishlarni kuchaytirish yuzasidan galdagi vazifalar belgilab olindi.
Yigʻilish yakunida Buxoro viloyatida 2025-yil 10-iyun kunidan 10-iyul kuniga qadar bir nechta maxsus, tezkor hamda profilaktik tadbirlarni oʻz ichiga olgan “Xavfsiz hudud dolzarb 30 kunlik“ maxsus profilaktik tadbirlarini oʻtkazish toʻgʻrisida qaror qabul qilinib, barcha huquq tartibot organlari hamda taalluqli idoralarning zimmasidagi vazifalar belgilab berildi.
Buxoro viloyati IIB Axborot xizmati