Yoshlar — kelajak bunyodkori. Yuksak marralar sari
2025-06-09 20:30:00 / Yangiliklar
Mamlakatimizda yoshlarni har tomonlama yetuk, bilimli, salohiyatli, komil inson sifatida tarbiyalash masalasi doimo eng ustuvor vazifa boʻlib kelgan. Ohangaron tumani IIB JXX Probatsiya guruhi inspektori, leytenant Shohsanam Isomiddinova Oʻzbekiston Respublikasi Huquqni muhofaza qilish akademiyasini tamomlab, ichki ishlar organlari safiga xizmatga qabul qilingan faol yoshlardan.
- Ota-onam oʻqituvchi. Maktabda dars berishadi. Ilm-fan, taʼlim-tarbiyaga alohida eʼtibor qaratadi. Boʻsh vaqtlarimda turli janrlardagi badiiy asarlarni mutolaa qilishni yaxshi koʻraman. Tikish-bichish, chevarlikka ham qiziqishim baland. Sport turlaridan taekvondoni yoqtiraman, — deydi lavhamiz qahramoni.
Bilamizki, xodimlarning jismoniy va jangovar tayyorgarligi bilan bir qatorda, ularning bilimi, intellektual salohiyati ham oʻzaro bellashuvlar shaklida oshirib boriladi. Toshkent viloyati IIBB va uning quyi tizimlarida xizmat qilayotgan yosh xodimlar ishtirokida «Zakovat» intellektual oʻyini hamda shaxmat va shashka turlari boʻyicha musobaqalar muntazam oʻtkazib kelinadi.
Yaqinda yuqoridagi ezgu maqsadlarga hamohang tarzda oʻtkazilgan viloyat miqyosidagi «Zakovat» bellashuvida Shohsanam va uning jamoadoshlari faxrli ikkinchi oʻrinni egallashdi. Xizmat faoliyatining dastlabki bosqichlarida Sh. Isomiddinovaga kapitan Bahrom Berdiyev murabbiy sifatida biriktirilib uni probatsiya xizmatining sir-asrorlari bilan tanishtirgan.
Maʼlumotlarga koʻra, probatsiya guruhi tomonidan joriy yil boshidan buyon 87 nafar shaxs hisobdan chiqarilib, sud hukmini qoʻpol ravishda buzgani uchun 12 nafarining jazo chorasi ogʻirrogʻiga almashtirilgan.
Hozirgi kunda probatsiya hisobida turadiganlarning umumiy soni 306 nafarni tashkil etadi. Yil boshidan buyon 8 marotaba mehnat yarmarkasi tashkil etilgan. Yosh xodima Shohsanam Isomiddinova har jabhada faol boʻlishga harakat qilib, xizmatda yuksak marralarni zabt etish niyati borligini yashirmadi.
Abror POYONOV, «Postda» muxbiri.