O‘zbеkiston Rеspublikаsi Ichki ishlаr vаzirligi

Oʻzbekiston respublikasi Vazirlar Mahkamasining tegishli topshirigʻiga asosan, xorijiy davlatlarning Oʻzbekistondagi diplomatik vakolatxonalari va konsullik muassasalari vakillarining Toshkent shahar Ichki ishlar bosh boshqarmasi Yagona tezkor boshqaruv markaziga tashrifi amalga oshirildi. Tashrif buyuruvchilarning eʼtiboriga: “Betakror Oʻzbekiston: Oʻzbekiston respublikasining turizm salohiyati”, “Oʻzbekiston respublikasi ichki ishlar organlarining xavfsiz turizmni taʼminlash boʻlinmalari faoliyati”, “Toshkent shahar Ichki ishlar bosh boshqarmasi Yagona tezkor boshqaruv markazining sayyohlar xavfsizligini taʼminlashdagi oʻrni” kabi mavzular havola etildi. Ushbu mavzularda Oʻzbekiston respublikasi Ichki ishlar vazirligi Xavfsiz turizm boshqarmasi boshligʻi N.Odilov, Toshkent shahar IIBB boshligʻi R.Sultanxodjayev va Turizm qoʻmitasi raisi maslahatchisi F.Fayzillayevlar tomonidan taqdim oʻtkazildi. Tojikiston respublikasining Oʻzbekistondagi elchisi Rahmonzoda Abdujabbor Aziziy yurtimizda sayyohlar xavfsizligini taʼminlash boʻyicha yaratilgan tizimni yuqori baholash bilan birga poytaxt koʻchalarida tirbandlik muammosi kuchayib borayotganini qayd etarkan, bu borada yoʻl harakati xavfsizligi xodimlarining talablariga qatʼiy rioya qilish va ularni toʻgʻri tushunish zarurligini taʼkidladi. Shuningdek, taqdimot ishtirokchilarini sayyohlar tomonidan Oʻzbekiston respublikasi IIV Xavfsiz turizm boshqarmasi Call-markaziga yordam soʻrab qilingan qoʻngʻiroqlariga sayyohning joylashgan manzilidan qatʼiy nazar respublika boʻyicha yordam koʻrsatish imkoniyati, ichki ishlar organlarining xavfsiz turizmni taʼminlash boʻlinmalari xodimlari qay darajada, qaysi chet tillarini bilishi, IIV turizm boshqarmasi Call-markazi qaysi tillarda xizmat koʻrsatishiga doir masalalar qiziqtirdi. Shu bilan birga Jahon sogʻliqni saqlash tashkiloti tomonidan Oʻzbekiston respublikasi ichki ishlar organlarining xavfsiz turizmni taʼminlash boʻlinmalari xodimlarini sayyohlarga tibbiy yordam koʻrsatish va favqulodda vaziyatlarda harakatlanish boʻyicha malakasini oshirishga qaratilgan loyihani ishlab chiqish taklifi berildi. Indoneziya elchixonasi Favqulodda va Muxtor vakili Sintia Kristian Saex oʻz mamlakatidan keladigan sayyohlar soni koʻpayib borayotganligini inobatga olib, turizm obyektlari va ichki ishlar organlarining xavfsiz turizmni taʼminlash boʻlinmalari xodimlari uchun indonez tili kurslarini tashkil etishda amaliy yordam koʻrsatish taklifini olgʻa surdi.

Tadbir yakunida chet davlatlarning Oʻzbekistondagi diplomatik vakolatxonalari va konsullik muassasalari vakillari yurtimizda fuqarolar jumladan, xorijlik sayyohlarning xavfsizligini taʼminlash borasida amalga oshirilayotgan islohotlarni ijobiy qayd etib, tashrifdan mamnun ekanliklarini izhor etdilar.

Toshkent shahar IIBB Axborot xizmati