Samarqandlik yosh xodimlarning poytaxt IIBB muzeyiga tashrif buyurishdi
2025-06-07 15:05:00 / Yangiliklar
Ichki ishlar organlari oʻz shonli tarixiga ega. Mazkur xizmat tarkib topganidan to shu kungacha boʻlgan shakllanishi, davr oʻzgarishlari, voqealar silsilasidan hikoya qiluvchi osori-atiqalarni oʻrganish orqali yoshlarda vatanparvarlik, xalqparvarlik, insonparvarlik, fidoiylik tuygʻularini yuksaltirishda muzeylarning shu jumladan, ichki ishlar organlari qoshida faoliyat yuritayotgan muzeylarning ahamiyati beqiyos. Yoshlarning tariximizni bilishlari, oʻz ajdodlariga hurmat-ehtirom koʻrsatishlari oʻz kelajaklarini yaratishlari uchun mustahkam poydevordir. Oʻzbekiston respublikasi Ichki ishlar vazirligining farmoyishiga asosan “Yoshlar oyligi” oʻtkazib kelinmoqda.
Mazkur oylik doirasida Samarqand viloyati Ichki ishlar boshqarmasining sohaviy xizmat xodimlaridan iborat 50 nafar yosh xodimlar Toshkent shahar IIBB boshqarmasi qoshida faoliyat yuritayotgan “Shon-sharaf” muzeyiga tashrif buyurishdi. Ular poytaxt ichki ishlar organlari tomonidan hududda tinchlik-osoyishtalikni saqlash, jinoyatchilikka qarshi kurash, huquqbuzarliklarning oldini olish, yurt-xalq manfaatlarini himoya qilish borasida uzoq oʻtmishda olib borilgan ishlar hamda jinoyatchilikka qarshi kurashda jonlarini fido qilgan xodimlarning jasorat va mardliklari toʻgʻrisida atroflicha maʼlumotlarga ega boʻldilar. Shuningdek, Toshkent shahar ichki ishlar organlari faoliyatida amalga oshirilayotgan islohotlar va xodimlar xususan, yosh kadrlarga yaratilayotgan imkoniyatlar, shart-sharoitlar va istiqbolli rejalar bilan ham tanishtirildi. Samarqandlik yosh xodimlarda muzey eksponatlari, foto va koʻrgazmali qurollar, tarixiy maʼlumotlar katta taassurot qoldirdi.
Toshkent shahar IIBB Axborot xizmati