O‘zbеkiston Rеspublikаsi Ichki ishlаr vаzirligi

Yurtimiz dunyoning koʻplab davlatlari bilan doʻstona va oʻzaro hurmat, teng huquqlilik aloqalarini oʻrnatib, koʻplab sohalarda tajriba almashish, ikki tomonlama hamkorlikni amalga oshirib kelmoqda.

Jumladan, Oʻzbekiston va Xitoy xalq respublikasini koʻp asrlik tarixiy rishtalar bogʻlab turadi. Chunonchi, oʻzaro munosabatlarda global xavfsizlik, mintaqaviy barqarorlik, zamonaviy tahdid va xatarlarga qarshi birgalikda kurashish kabi masalalar borasida Oʻzbekiston respublikasi Ichki ishlar vazirligi va Xitoy Jamoat xavfsizligi vazirligi oʻrtasida koʻp qirrali hamkorlik yoʻlga qoʻyilganini alohida taʼkidlash joiz.

Xususan, taʼlim sohasida aloqalarning faol tarzda rivojlanib borayotgani, zamonaviy texnologiyalarning ilgʻor yutuqlarini oʻrganish va tizim uchun yuqori malakali kadrlar tayyorlash borasida amalga oshirilayotgan ishlar eʼtirofga loyiqdir. Shu maqsadlarda Xitoy xalq respublikasi Jamoat xavfsizligi universiteti bir guruh talabalari taʼlim olish va tajriba almashish uchun yurtimizga tashrif buyurishdi.

Xitoylik talabalar IIV Akademiyasida ikki haftalik oʻquv kurslari davomida Toshkent shahar IIBB faoliyati bilan ham yaqindan tanishdilar. Ular Bosh boshqarma “Shon-sharaf” muzeyiga tashrifi chogʻida poytaxt ichki ishlar organlarining uzoq tarixi, uning shakllanish va rivojlanish jarayonlari, tinchlik – osoyishtalik, jamoat tartibini saqlash, jinoyatchilikka qarshi kurash, huquqiy davlat barpo etish yoʻlida shu kungacha bosib oʻtgan zafarli yoʻli haqida hikoya qiluvchi osori-atiqalar, foto va koʻrgazmali qurollar bilan tanishdilar.

Bosh boshqarmaning Axborot multimedia markazining poytaxt ichki ishlar organlari xodimlari tomonidan jinoyatchilikning har qanday koʻrinishi, huquqbuzarliklarning oldini olish, jamoat tartibini saqlash borasida amalga oshirayotgan ishlarini keng jamoatchilik eʼtiboriga havola etish boʻyicha olib borayotgan ishlari ularda katta qiziqish uygʻotdi.

Toshkent shahar IIBB Axborot xizmati