IIV akademiyasi professor-oʻqituvchilari va kursantlari ilgʻor tajribalarni oʻrganish maqsadida Xitoy davlatida boʻldi
2025-06-05 09:25:00 / Yangiliklar
Xorij safari davomida Xitoy Jamoat xavfsizligi universiteti bilan hamkorlik doirasida oʻquv kursi tashkil qilindi. Ikki hafta davomida malakali mutaxassislar tomonidan Xitoy davlatchiligi tarixi, mamlakatning ichki va tashqi siyosati, rivojlanish yoʻli, davlat boshqaruvi tizimi, hozirgi global sharoitda xavfsizlik va barqarorlikni taʼminlash omillari, zamonaviy tahdid va xatarlarga qarshi kurashishda huquqni muhofaza qiluvchi tuzilmalarning roli, bu borada Xitoy tajribasining oʻziga xos jihatlari va boshqa dolzarb mavzularda mashgʻulotlar oʻtkazildi.
Bundan tashqari, vakillarimiz Pekin politsiya tuzilmalari va Jamoat xavfsizligi universitetida boʻlib, amaliyotga tatbiq qilingan eng ilgʻor yondashuvlar bilan tanishdilar. Ayniqsa xitoylik talabalar bilan oʻtkazilgan intellektual bellashuvlar, madaniy va sport tadbirlari ikki mamlakat yoshlari oʻrtasidagi doʻstona munosabatlarni mustahkamlashga xizmat qildi. Pekin shahrining diqqatga sazovor joylariga sayohat koʻhna Xitoy tarixi, madaniyati, milliy anʼana va qadriyatlari haqidagi taassurotlarni yanada boyitdi.
Muxtasar aytganda, IIV akademiyasi va Jamoat xavfsizligi universiteti oʻrtasida yoʻlga qoʻyilgan samarali hamkorlik innovatsion yutuqlarni oʻrganish, manfaatli yoʻnalishlarda oʻzaro tajriba almashish, taʼlim sifati va kadrlar salohiyatini oshirishda muhim omil boʻlmoqda. Ayni jihatlar oʻquv kursi yakunlari boʻyicha oʻtkazilgan uchrashuvda ham alohida eʼtirof etildi.
IIV akademiyasi Axborot xizmati