IIV Akademiyasi kunduzgi taʼlim 3-oʻquv kursi kursantlari uchun yakuniy davlat attestatsiyasi imtihonlari boshlandi
2025-06-04 09:00:00 / Yangiliklar
Shu munosabat bilan oʻtkazilgan yigʻilishda IIV sohaviy xizmatlari vakillari, akademiya rahbariyati, imtihonlarga jalb qilingan professor-oʻqituvchilar va bitiruvchilar ishtirok etdi.
Yigʻilishda yakuniy davlat attestatsiyasini tashkil etish va oʻtkazish boʻyicha buyruqlar oʻqib eshittirildi. Komissiya raislari va aʼzolariga taʼlim sifati va samaradorligini oshirish, tizim uchun yuqori malakali kadrlar tayyorlash borasidagi dolzarb talablar yetkazildi.
Shu kunning oʻzida dastlabki imtihonlar boshlandi.
25-iyunga qadar kursantlar ixtisoslik, ichki ishlar organlari xodimlarining kasb madaniyati va xizmat intizomi hamda yuristlar uchun xorijiy til fanlari boʻyicha imtihon topshirib, malakaviy bitiruv ishlarini himoya qiladilar.
Aytish joizki, joriy yil akademiya kunduzgi taʼlim bakalavriatini 8 ta ixtisoslik yoʻnalishi boʻyicha kadrlar tamomlaydi.
Shuni alohida qayd etish joizki, davlat attestatsiyasi jarayonlarida shaffoflik va xolislikni taʼminlash, har bir kursantning bilim va mahoratini adolatli baholashga katta eʼtibor qaratilmoqda.
Bu borada Akademiyada joriy etilgan zamonaviy baholash usullari va axborot texnologiyalari muhim ahamiyat kasb etmoqda.
IIV Akademiyasida taʼlim olayotgan kursantlar — bugungi kundagi bilimli, fidoyi va Vatanga sadoqatli kadrlar zaxirasidir.
Ularning muvaffaqiyatli attestatsiyadan oʻtishi ichki ishlar organlarining kelajakda yanada professional va samarali faoliyat yuritishiga xizmat qiladi.
IIV Akademiyasi Axborot xizmati