Namangan viloyati IIB va Milliy gvardiya boshqarmasi rahbariyati hududlarda jinoyatlarning sodir etilishi sabablari tahlil qilmoqda
2025-06-04 09:00:00 / Yangiliklar
Jinoyatchilikka qarshi kurashish, aholining huquqiy xavfsizligini taʼminlash, jamoatchilik bilan oʻzaro muloqotni kuchaytirish borasida joylarda amalga oshirilayotgan ishlar tizimli tahlil qilinmoqda.
Jumladan, Namangan viloyati Ichki ishlar boshqarmasi va Oʻzbekiston Respublikasi Milliy gvardiyasi viloyat boshqarmasi rahbariyati Pop tumanining “Gʻurumsaroy” mahallasida boʻlib, hududdagi kriminogen vaziyat atroflicha muhokama qilindi.
Oʻrganishlar davomida, mahalla yettiligi va hududga biriktirilgan masʼul xodimlarning oʻzaro hamkorligi toʻgʻri tashkil etilmaganligi, aholi muammolari oʻrganilmaganligi, nizoli oilalar bilan manzilli ishlar tashkil etilmaganligi natijasida ogʻir va oʻta ogʻir turdagi jinoyatlarning sodir etilganligi keskin tanqid qilindi.
Masʼul rahbarlar tomonidan jinoyatchilikka qarshi kurashda profilaktika ishlarini kuchaytirish, har bir mahallada xavfsiz muhitni shakllantirish, aholi bilan doimiy muloqotda boʻlib, ularning dardu tashvishlarini oʻrganish va hal etish yuzasidan aniq vazifalar va topshiriqlar belgilab berildi.
Yigʻilish yakunida har bir masʼul xodimdan mahalla fuqarolari bilan yaqin hamkorlikda ishlash, jinoyatlar va huquqbuzarliklarning oldini olishga qaratilgan aniq chora-tadbirlarni ishlab chiqish, aholining huquqiy madaniyatini oshirish boʻyicha keng qamrovli ishlarni amalga oshirilishi qayd etildi.
Shu bilan birga, mahalla yettiligi aʼzolariga profilaktika inspektorlari bilan yaqin aloqada boʻlib, har bir xonadon, har bir oilaning ichki muhiti va ehtiyojlarini oʻrganish, profilaktik suhbatlar tashkil qilish hamda yoshlar oʻrtasida huquqbuzarliklarning oldini olishga qaratilgan maʼnaviy-maʼrifiy tadbirlarni keng yoʻlga qoʻyish boʻyicha koʻrsatmalar berildi.
Bu kabi tahliliy uchrashuvlar viloyatning barcha tuman va shaharlarida bosqichma-bosqich oʻtkazilishi belgilangan boʻlib, ular orqali har bir hududdagi haqiqiy holati, mavjud muammolar va yechimlar aniqlanadi, fuqarolarning xavfsizligi taʼminlanishidagi masʼuliyati yanada kuchaytiriladi.
Namangan viloyati IIB Axborot xizmati