IIV Qorovul qoʻshinlari bir guruh harbiy xizmatchilari jamoatchilik vakillari bilan hamkorlikda Andijon shahridagi Onkologiya va Gematologiya shifoxonasida davolanayotgan bemor bolalar holidan xabar olishdi
2025-06-04 09:00:00 / Yangiliklar
Oʻzbekiston Respublikasi IIV Qorovul qoʻshinlari harbiy xizmatchilari tomonidan navbatdagi ezgu tashabbus amalga oshirildi. Jamoatchilik vakillari bilan hamkorlikda tashkil etilgan tashrif doirasida bir guruh harbiylar Andijon viloyati Onkologiya va Gematologiya shifoxonasida davolanayotgan bolajonlar holidan xabar olishdi.
Tashrif davomida 40 nafarga yaqin qalbi sof, orzulari ulkan bolalar bilan samimiy muloqot oʻtkazildi. Ularga maʼnaviy va ruhiy koʻmak koʻrsatish maqsadida suhbatlar tashkil etildi, dardlari tinglandi, shodlik ulashildi.
Bolalarning kayfiyatini koʻtarish, kunlarini mazmunli va bahramand oʻtkazishlari uchun ularga badiiy va rivojlantiruvchi kitoblar, esdalik sovgʻalari hamda turli xil oʻyinchoqlar taqdim etildi.
Shuningdek, shifoxonada bemor bolalarga chin qalbdan xizmat qilayotgan tibbiyot xodimlari bilan ham uchrashuv oʻtkazilib, ularning fidokorona mehnatlari alohida eʼtirof etildi. Qorovul qoʻshinlari qoʻmondonligi nomidan shifokorlarga va hamshiralarga samimiy minnatdorlik bildirilib, ularning har bir saʼy-harakatlari yuqori baholandi.
Tashrif “Yoshlar oyligi “doirasidagi tadbirlar doirasida oʻtkazildi. Ayni paytda butun respublika boʻylab IIV Qorovul qoʻshinlari tomonidan joylarda shu kabi ishlar amalga oshirilmoqda.
Ushbu tashabbuslar harbiy xizmatchilarning faqatgina xavfsizlikni taʼminlashda emas, balki jamiyatda insoniylik, mehribonlik va hamdardlik qadriyatlarini mustahkamlashda ham faol ishtirok etayotganini yaqqol namoyon etmoqda.
Bemor bolalar uchun bayram munosabati bilan tashkil etilgan ushbu tashrif Qurbon Hayiti arafasida ularning qalbida umid, ishonch va shodlik uygʻotdi.
Harbiy xizmatchilarning ezgu mehri, bolalarning koʻzlaridagi quvonch va shodlik – bu saʼy-harakatlarning eng muhim natijasidir.
IIV Qorovul qoʻshinlari Qoʻmondonligi bu kabi maʼnaviy-maʼrifiy tadbirlarni kelgusida ham tizimli ravishda tashkil etishni rejalashtirmoqda.
Bunday amaliy mehr koʻrsatish faoliyatlari jamiyatimizda sogʻlom muhitni, hamjihatlik va insonparvarlik ruhini mustahkamlashga xizmat qiladi.
IIV Qorovul qoʻshinlari qoʻmondonligi