Oʻzbekiston Respublikasi Oliy harbiy aviatsiya bilim yurti hamda Ichki ishlar vazirligi Malaka oshirish instituti oʻrtasida oʻzaro hamkorlik toʻgʻrisidagi memorandum imzolandi
2025-06-03 09:35:00 / Yangiliklar
2025-yil 29–31-may va 1-iyun kunlari Toshkent shahri Olmazor tumanidagi “Gʻalaba bogʻi” yodgorlik majmuasida MSITF-2025 – Mudofaa sohasida innovatsion texnologiyalar festivali boʻlib oʻtdi.
Tadbir davomida Qurolli Kuchlar ehtiyojlari uchun zarur boʻlgan zamonaviy texnologiyalar, metallurgiya, kimyo sanoati hamda yengil sanoat (tekstil) sohalarida ikki maqsadga moʻljallangan mahsulotlar namoyish etildi.
Festivalda ishlab chiqaruvchi tashkilotlar, yirik korxonalar, jismoniy shaxslar hamda ixtirochilar oʻz innovatsion ishlanmalari va mahsulotlarini taqdim etdilar.
1-iyun – Xalqaro bolalarni himoya qilish kuni munosabati bilan “Gʻalaba bogʻi” yodgorlik majmuasi hududida bolalar uchun koʻrgazmali namoyishlar, mahorat darslari, koʻngilochar dasturlar hamda turli sport musobaqalari tashkil etildi.
Tadbir bolajonlar kayfiyatini koʻtarish va ularning dunyoqarashini kengaytirishga xizmat qildi.
Festivalda Oʻzbekiston Respublikasi Ichki ishlar vazirligi Malaka oshirish instituti rahbariyati va professor-oʻqituvchilari ham faol ishtirok etdilar.
Tadbir doirasida Oʻzbekiston Respublikasi Oliy harbiy aviatsiya bilim yurti hamda Ichki ishlar vazirligi Malaka oshirish instituti oʻrtasida oʻzaro hamkorlik toʻgʻrisidagi memorandum imzolandi.
Mazkur hujjatga koʻra, ikki taʼlim muassasasi oʻrtasida oʻquv dasturlari, oʻquv-metodik va normativ hujjatlarni birgalikda ishlab chiqish, taʼlim jarayoniga zamonaviy axborot-kommunikatsiya texnologiyalarini joriy etish, innovatsion va texnologik gʻoyalarni rivojlantirish, qonunchilik va huquqni qoʻllash amaliyotini takomillashtirishga doir ilmiy asoslangan xulosa va tavsiyalar ishlab chiqish yoʻnalishlarda hamkorlik yoʻlga qoʻyilishi belgilandi.
IIV Malaka oshirish instituti