IIV akademiyasida mahallalarda huquqbuzarliklarning barvaqt oldini olish va jinoyatchilikni jilovlash borasida amalga oshirilayotgan ishlarga bagʻishlangan davra suhbati boʻlib oʻtdi
2025-06-03 09:05:00 / Yangiliklar
Tadbirda Mirzo Ulugʻbek tumani prokuraturasi, Ichki ishlar organlari faoliyatini muvofiqlashtirish boshqarmasi vakillari, Huquqbuzarliklar profilaktikasi faoliyati kafedrasi professor-oʻqituvchilari va kursantlar qatnashdi.
Soʻzga chiqqanlar davlatimiz rahbari tomonidan joriy yil 3-yanvarda qabul qilingan “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi qarori doirasida amalga oshirilayotgan chora-tadbirlarga toʻxtalib oʻtishdi.
Hududlarning kriminogen vaziyatini oʻrganish, jinoyat oʻchoqlarini aniqlash va bartaraf etish, aholi bilan manzilli ishlashga qaratilgan samarali tizim yaratilgani, oʻtgan davr mobaynida jinoyat sodir etilgan mahallalarda tizimli ishlar amalga oshirilgani, “yoʻl xarita”larida belgilab olingan chora-tadbirlar natijasida huquqbuzarliklar barvaqt oldi olinayotgani qayd etildi.
Davra suhbatida mazkur faoliyat samaradorligini oshirish borasida yechimini kutayotgan ayrim masalalar, kelgusidagi muhim vazifalar yuzasidan ham fikr almashildi. Taʼlim muassasasini bitirish arafasida turgan kursantlarga amaliy tavsiyalar berildi.
IIV akademiyasi Axborot xizmati