O‘zbеkiston Rеspublikаsi Ichki ishlаr vаzirligi

Siz mahallangizni poytaxtdagi mashhur mahallaga aylantirmoqchimisiz? Oʻzingiz sevgan mashgʻulot bilan shugʻullanib katta yutuqni qoʻlga kiritmoqchimisiz? Unda bu eʼlon aynan siz uchun!

Toshkent shahar Ichki ishlar bosh boshqarmasi 17 yoshdan 30 yoshgacha boʻlgan mahalla yoshlarini voleybol musobaqasiga taklif etadi.

Sogʻlom turmush tarzini targʻib qilish, uyushmagan yoshlarni birlashtirish, ularni jismoniy tarbiya va sport bilan shugʻullanishga jalb etish, yoshlar oʻrtasida voleybolni ommalashtirish, shuningdek voleybol sohasidagi iqtidorli yoshlarni aniqlash va qoʻllab quvvatlash maqsadida voleybol boʻyicha Toshkent shahar IIBB boshligʻining kubogi musobaqalari start berilganligini eʼlon qilamiz.

Joriy yilning 15 fevraligacha havaskor mahalla yoshlaridan iborat alohida qizlar va oʻgʻil bolalar jamoalari shakllantiriladi.

Musobaqa 3 bosqichda oʻtkaziladi:

1-bosqich: 15-25 fevral kunlari sektorlar kesimida gʻoliblar aniqlanadi;

2-bosqich: 26 fevral — 5 mart kunlari tumanlar kesimidagi gʻolib jamoalar aniqlanadi.

Tuman bosqichida gʻolib deb topilgan jamoalar qimmatbaho sovgʻalar bilan taqdirlanadilar.

3-bosqich final: 6-20 mart kunlari oʻtkaziladi. Unda eng yaxshi qizlar va oʻgʻil bolalar jamoalari aniqlanadi.

Voleybol boʻyicha Toshkent shahar IIBB boshligʻining kubogida gʻolib deb topilgan jamoa aʼzolarining har biriga 7.000.000 soʻmdan, ikkinchi oʻrinni egallagan jamoa aʼzolarining har birga 5.000.000 soʻmdan, uchinchi oʻrinni egallagan jamoa aʼzolarning har biriga 3.000.000 soʻmdan pul mukofotlari topshiriladi. Shuningdek, musobaqaning final bosqichida gʻolib deb topilgan yoshlarga sport razryadlari beriladi.

Mazkur musobaqada ishtirok etish istagini bildirgan yoshlar mahalla profilaktika inspektoriga yoki yoshlar yetakchisiga murojaat qilishlari soʻraladi.

Imkoniyatni qoʻldan boy bermang! Oʻzingizni koʻrsating!

Toshkent shahar IIBB Axborot xizmati