Ichki ishlar xodimlari va ularning oila aʼzolari Samarqand shahriga sayohat qildi
2025-06-02 15:00:00 / Yangiliklar
Ichki turizmni rivojlantirish, jamoa va oilaviy sayohat madaniyatini shakllantirish maqsadida Ichki ishlar vazirligi va Birlashgan kasaba uyushmasi qoʻmitasi hamkorligida navbatdagi madaniy-maʼrifiy sayohatlar tashkil etildi.
Oʻzbekiston Respublikasi Prezidentining 2018-yildagi PQ–3514-son qarori hamda joriy yilning 9-aprel kuni oʻtkazilgan videoselektor yigʻilishida har oyning bitta shanba va yakshanbasini «Oila va mehnat jamoasi bilan sayohatga chiqish kuni« deb eʼlon qilish tashabbusi doirasida mazkur sayohat tashkil etildi.
Ichki ishlar vazirligining markaziy apparati va hududiy boʻlinmalarida namunaviy xizmat olib borayotgan xodimlar hamda ularning oila aʼzolari uchun Samarqand shahriga uyushtirilgan sayohat — nafaqat dam olish, balki milliy tarix va madaniyat bilan yaqindan tanishish imkonini ham berdi.
Bu sayohatda ishtirok etganlar Ulugʻbek rasadxonasi, Registon maydoni, Shahi Zinda, Amir Temur maqbarasi va boshqa tarixiy obidalarni ziyorat qilishdi. Tashkil etilgan turlar ishtirokchilarda katta taassurot qoldirdi va ularning xizmatga boʻlgan motivatsiyasini yanada oshirishga xizmat qildi.
Mazkur tashabbus Ichki ishlar vazirligi va kasaba uyushmalari hamkorligida xodimlarning maʼnaviy-maʼrifiy hordiq chiqarishini taʼminlash, oilaviy munosabatlarni mustahkamlash va mehnat jamoalarida ijobiy muhit yaratishga qaratilgan keng koʻlamli ishlarning yaqqol namunasidir.