Ichki ishlar sohasida yangi mutaxassislar safga qoʻshildi
2025-06-02 07:20:00 / Yangiliklar
Ichki ishlar vazirligi Malaka oshirish institutida boshlangʻich kasbiy tayyorgarlik oʻquv kursi tinglovchilarining tantanali qasamyod qabul qilish marosimi va bitiruv tadbiri boʻlib oʻtdi.
Tadbirda institut rahbariyati, professor-oʻqituvchilar, huquqni muhofaza qiluvchi organ xodimlari, keng jamoatchilik vakillari hamda tinglovchilarning yaqinlari ishtirok etdi. Dastlab Oʻzbekiston Respublikasi Davlat madhiyasi yangradi. Shundan soʻng, tinglovchilar Vatanga, xalqimizga sadoqat bilan xizmat qilishga, qonunlarga rioya etgan holda oʻz xizmat burchini sidqidildan bajarishga tantanali ravishda qasamyod qabul qildilar.
Tadbir davomida institut rahbariyati tomonidan tinglovchilarga oʻquv kursini muvaffaqiyatli tamomlagani uchun sertifikatlar topshirildi. Shuningdek, bitiruvchilarga kelgusi xizmat faoliyatlarida omad, masʼuliyat va halollik yor boʻlishi tilandi.
Mazkur tadbir yosh xodimlarda Vatanga xizmat qilishdek sharafli va masʼuliyatli burchni chuqur anglash hissini yanada mustahkamladi.
Maftuna Uzoqova,
OʻzDJTU talabasi, IIV Malaka oshirish instituti Matbuot xizmati amaliyotchisi