O‘zbеkiston Rеspublikаsi Ichki ishlаr vаzirligi

Davlatimiz rahbari tashabbusi bilan joriy etilgan sayyor qabullar tizimi aholining talab va ehtiyojlarini qondirish, joylarda ijtimoiy-iqtisodiy muhitni yanada yaxshilashga xizmat qilmoqda.

Poytaxtimiz aholisi uchun tashkillashtirilgan navbatdagi sayyor qabul Chilonzor tumani hokimiyati binosida boʻlib oʻtdi. Chilonzor va Uchtepa tumanlari aholisini murojaatlarini oʻrganish maqsadida tashkil etilgan sayyor qabulda poytaxt IIBB rahbariyati va Toshkent shahar xalq qabulxonasi mudiri tomonidan oʻtkazilgan qabulda mutasaddi tashkilotlar masʼullari ham ishtirok etishdi.

Sayyor qabul davomida jami 23 nafar fuqarolarning muammolari oʻrganildi. Ulardan 1 tasi oila turmush doirasida kelishmovchilik, 4 tasi ichki ishlar organlariga xizmatga qabul qilish, xizmatni oʻtash va qayta tiklash yuzasidan, 8 tasi probatsiya hisobida turgan shaxslarni muddatidan ilgari shartli ozod qilish masalasida, 2 tasi Oʻzbekiston Respublikasi fuqaroligini olish boʻyicha, 1 tasi profilaktik hisobdan chiqarish masalasida2 1 tasi davolanish uchun moddiy yordam boʻyicha hamda 6 nafari ichki ishlar organlari ish yurituvidagi hujjatlar bilan bogʻliq masalalar yuzasidan murojaat qildilar.

Murojaatlarning 10 tasi joyida ijobiy hal etildi, koʻrib chiqish qoʻshimcha muddat talab etadigan 13 ta murojaatlarning ijrosi nazoratga olindi. 2 nafar fuqaroga Oʻzbekiston Respublikasining fuqarolik pasportini olishda amaliy yordam koʻrsatildi. Poytaxtimizning Chilonzor va Uchtepa tumanlari IIO FMB Probatsiya xizmati hisobida turgan jami 8 nafar fuqarolar Jinoyat kodeksining 73-moddasiga asosan jazoni oʻtashdan muddatidan ilgari shartli ozod qilindi.

Bu kabi sayyor qabullar aholi va davlat organlari oʻrtasida ochiq muloqotni taʼminlash, muammolarni kechiktirmasdan hal etishda muhim qadam hisoblanadi. Ushbu tadbirlar fuqarolarning davlat idoralariga boʻlgan ishonchini oshirish, jamiyatda samarali ijtimoiy sheriklikni rivojlantirishga xizmat qiladi.

Toshkent shahar IIBB Axborot xizmati