Ishchi guruh faoliyatidan. Olis hudud muammolari hal etilmoqda
2025-05-31 23:00:00 / Yangiliklar
Turli soha mutasaddilaridan iborat respublika ishchi guruhining navbatdagi sayyor qabuli Zarafshon shahrida tashkil etildi. Olis hududlar aholisining muammolarini oʻrganish, ularga amaliy yordam koʻrsatish maqsadida boʻlib oʻtgan mazkur qabulda Zarafshon shahri, Uchquduq va Tomdi tumanlari fuqarolari qatnashdi.
Qabul jarayonida aholining huquqiy, ijtimoiy va iqtisodiy masalalarga oid murojaatlari oʻrganildi. Jumladan, IIV masʼullari hamda viloyat IIB boshligʻi tomonidan fuqarolik masalalari, nizoli holatlar, yer va mulkka oid shikoyatlar tinglanib, ayrimlari joyida hal etildi.
Maya Usmonova Zarafshon shahri “Quruvchi” mahallasida istiqomat qiladi. Ayolning bugun 32-yillik orzusi ushaldi — unga Oʻzbekiston Respublikasi fuqaroligiga qabul qilinganligi haqidagi hujjat topshirildi.
Fuqarolikning yoʻqligi mening ayrim huquqlarimni cheklardi. Ammo koʻp millatli Zarafshon xalqining mehmondoʻstligi, ochiqkoʻngilligi bizni shu yerda uzoq yillar istiqomat qilishimizga sababchi boʻldi. Mana, endi men ham Oʻzbekiston Respublikasi fuqarosiman, — deydi faxr bilan Maya Usmonova.
Shuningdek, qabul jarayonida 16 yoshga toʻlgan zarafshonlik? nafar oʻgʻil-qizga Oʻzbekiston Respublikasi shaxs guvohnomasi — ID kartalari topshirildi.
Bundan tashqari, sayyor qabul doirasida murojaatchilarning aksar dolzarb ijtimoiy muammolariga joyida yechim topildi, baʼzilariga huquqiy yordam koʻrsatildi.
Bu kabi tadbirlar xalqning davlat organlariga ishonchi ortishiga xizmat qilishi shubhasiz.
©️ “Postda” gazetasi, Mahliyo Xolova, Navoiy viloyati.