“Payshanba – profilaktika kuni” munosabati bilan Sirdaryoda samarali tadbirlar davom etmoqda
2025-05-30 22:55:00 / Yangiliklar
Sirdaryo viloyatida jinoyatchilik va huquqbuzarliklarning oldini olish, aholi oʻrtasida huquqiy ong va huquqiy madaniyatni oshirish maqsadida joriy haftaning payshanba kuni “Profilaktika kuni” doirasida keng qamrovli kompleks tadbirlar tashkil etildi.
Tadbir viloyat prokurori va Sirdaryo viloyati Ichki ishlar boshqarmasi boshligʻi rahbarligida oʻtkazilgan kengaytirilgan yigʻilish bilan boshlandi. Yigʻilishda joriy yilning oʻtgan davridagi jinoyatchilik holati tahlil qilinib, jamiyatda xavfsizlikni taʼminlashga qaratilgan chora-tadbirlarning samaradorligini oshirish yuzasidan aniq vazifalar belgilab olindi.
Profilaktika kuni doirasida maʼmuriy huquqbuzarlik sodir etgan shaxslarning qilmishlari sayyor sudlarda koʻrib chiqildi. Bundan tashqari viloyatning barcha tuman va shaharlarida profilaktika inspektorlari tomonidan mahallalarda “uyma-uy” yurishlar tashkil etildi. Jinoyat sodir etishga moyil shaxslar, profilaktik roʻyxatda turgan fuqarolar, muhtoj oilalar holati oʻrganilib, ular bilan manzilli suhbatlar olib borildi. Shuningdek, huquqbuzarliklarga moyil boʻlgan yoshlar bilan psixologik va huquqiy maslahatlar tashkil etildi.
Xotin-qizlar masalalari boʻyicha masʼul inspektorlar tomonidan zoʻravonlikdan jabr koʻrgan ayollar, nizoli oilalar, yolgʻiz onalar holati oʻrganildi. Ularga huquqiy yordam, psixologik qoʻllab-quvvatlash va zaruratga qarab ish bilan taʼminlash boʻyicha tavsiyalar berildi. Mahalla va taʼlim muassasalarida qizlar bilan “Oila muqaddasligi”, “Zoʻravonlikka yoʻl qoʻymaylik” mavzularida uchrashuvlar tashkil etildi.
Yoʻl harakati xavfsizligi boshqarmasi xodimlari tomonidan aholi gavjum joylar va taʼlim muassasalari atrofida yoʻl harakati qoidalariga rioya etilishi yuzasidan reydlar oʻtkazildi. Haydovchilar va piyodalarga qoidalar toʻgʻrisida tushuntirishlar berildi. Bolalarni maxsus oʻrindiqlarda tashish, svetofor va zebradan toʻgʻri oʻtish boʻyicha amaliy koʻrgazmalar tashkil etildi.
Jamoat tartibini saqlash boshqarmasi xodimlari tomonidan bozorlar, koʻngilochar maskanlar va jamoat joylarida nazorat kuchaytirildi. Tinchlik va xavfsizlikni taʼminlash maqsadida reydlar tashkil etildi. Yoshlar yigʻiladigan joylar, kafelar hamda bogʻlar alohida nazoratga olindi.
Qoʻriqlash xizmati xodimlari tomonidan mahallalarda xonadonlarni texnik vositalar orqali qoʻriqlovga ulash yuzasidan targʻibot ishlari olib borildi. Fuqarolarga signalizatsiya va video kuzatuv vositalarini oʻrnatishning afzalliklari tushuntirildi.
Profilaktika kuni doirasida Probatsiya xizmati xodimlari ham faol ishtirok etdi. Nazoratda turgan shaxslar holati oʻrganilib, ular bilan yakka tartibdagi ish olib borildi. Joylarda sayyor sudlar oʻtkazildi.
Xulosa oʻrnida aytish mumkinki, Sirdaryo viloyatida “Payshanba – profilaktika kuni” faqatgina yakka chora-tadbir emas, balki aholi bilan samarali muloqot, jinoyatchilikka qarshi keng qamrovli harakatlar tizimining muhim bir boʻgʻini hisoblanadi. Bunday tashabbuslar orqali jamiyatda tinchlik va xavfsizlikni taʼminlashga qaratilgan ishlar izchil davom ettirilmoqda.