Toshkent viloyati Piskent tumanida “General va yoshlar” ochiq muloqot uchrashuvi boʻlib oʻtdi
2025-05-30 12:50:00 / Yangiliklar
29-may kuni Piskent tumanida “General va yoshlar” uchrashuvi boʻlib oʻtdi. Uchrashuvda huquqni muhofaza qiluvchi organlarning faxriy generallari, Respublika ishchi guruhi masʼullari, vazirlik va idoralar rahbarlari, tuman hokimi, shuningdek, bir guruh yoshlar va nuroniylar ishtirok etdi.
Tadbir davomida isteʼfodagi general mayor Sayfulla Asadov va boshqa qatnashchilar oʻz hayot va xizmat yoʻllaridan saboq boʻladigan misollarni keltirib, yoshlarni fidoyilik, halollik va Vatanga sadoqat ruhida tarbiyalash zarurligini taʼkidlashdi. Ularning chiqishlari yoshlar uchun chinakam ruhlantiruvchi va ibrat manbai boʻldi.
Yoshlar oʻzlarini qiziqtirgan savollar bilan murojaat qilib, turli taklif va tashabbuslarini bildirishdi. Ushbu fikr-mulohazalar asosida kelgusida amalga oshiriladigan chora-tadbirlar belgilab olindi.
Bundan tashqari, viloyat IIBB Ekspert-kriminalistika markazining maxsus koʻchma laboratoriyasi hamda ichki ishlar organlarining kuch vositalari koʻrgazmasi yoshlar uchun namoyish etilib, ular batafsil maʼlumotlarga ega boʻlishdi.
Uchrashuv yoshlar bilan ochiq va samimiy muloqotni kuchaytirish, ularning muammolarini hal etish hamda Vatanga muhabbat tuygʻusini mustahkamlashda muhim ahamiyat kasb etdi.
Toshkent viloyati IIBB Axborot xizmati