Respublika ishchi guruhining Buxoro viloyatidagi sayyor qabullari: aholi murojaatlariga samarali yechim boʻlmoqda
2025-05-29 17:00:00 / Yangiliklar
Buxoro viloyatida Respublika ishchi guruhi tomonidan tashkil etilgan sayyor qabullar aholi bilan ochiq muloqotni taʼminlash, mavjud muammolarni aniqlash va ularga samarali yechim topishda muhim platforma vazifasini oʻtamoqda.
Joriy yil 29-may kuni shunday qabullarning navbatdagisi Qorakoʻl tumanidagi “Acharya” Universiteti binosida boʻlib oʻtdi. Unda Ichki ishlar vazirligi hamda Buxoro viloyati Ichki ishlar boshqarmasi masʼullari ham ishtirok etib, fuqarolar bilan toʻgʻridan-toʻgʻri muloqot qilishdi.
Qabul jarayonida Qorakoʻl, Olot va Jondor tumanlari aholisi hamda avvalgi sayyor qabullarda qatnashish imkoniga ega boʻlmagan boshqa tumanlardan kelgan fuqarolar ham oʻz murojaatlari bilan chiqishdi.
Murojaatlar turli sohalarga — ish bilan taʼminlash, ijtimoiy himoya, huquqiy nizolar, ichki ishlar organlari faoliyati bilan bogʻliq shikoyatlar va boshqa muammolarga oid boʻldi.
Har bir murojaat masʼullar tomonidan diqqat bilan eshitilib, ayrim masalalar shu yerning oʻzida hal etildi. Batafsil oʻrganishni talab etuvchi holatlar boʻyicha esa tegishli mutasaddilarga vazifalar yuklatilib, aniq muddat va ijrochilar belgilandi.
Qabul jarayonida fuqarolarga huquqiy maslahatlar berildi, ularning murojaatlari rasmiy roʻyxatga olinib, nazoratga olindi. Mazkur muloqotlar aholi va davlat organlari oʻrtasidagi ishonchni mustahkamlashga, fuqarolarning davlat va jamiyat hayotidagi ishtirokini faollashtirishga xizmat qilmoqda.
Shuni alohida taʼkidlash lozimki, sayyor qabullar orqali muammolarning mahalliy darajada hal qilinishiga erishilmoqda. Bu esa nafaqat odamlar hayotini yengillashtirish, balki davlat boshqaruvining samaradorligini oshirishga ham hissa qoʻshmoqda.
Buxoro viloyati IIB Axborot xizmati