O‘zbеkiston Rеspublikаsi Ichki ishlаr vаzirligi

Firuzjon Negov Buxoro davlat universitetining jismoniy tarbiya va jismoniy madaniyat fakultetini bitirgach, Vobkent tumanidagi 14-bolalar va oʻsmirlar sport maktabida murabbiylik qildi. Oʻzi ham sportning milliy kurash va sambo turi boʻyicha musobaqalarda faol qatnashib, sovrinli oʻrinlarni egalladi. 2013-yil may oyidan boshlab ichki ishlar organlarida xizmat qilyapti.

Shofirkon tumani IIV profilaktika inspektori lavozimida xizmatni boshlagan Firuzjon ayni paytda Buxoro tumani 11V Tashkiliy boʻlinma Navbatchilik qismi katta inspektor-navbatchisi sifatida faoliyat koʻrsatmoqda. U tuman IIBga kelib tushgan ariza va xabarlarni oʻz vaqtida hisobga olib, voqea joyiga tergov-tezkor guruhini toʻliq tartibda chiqarishni taʼminlaydi.

Tan olish kerakki, “102” raqamiga turli feʼl-atvorli kishilar har xil masala yuzasidan murojaat qiladi. Biriga talonchi hujum qilayotgan boʻladi, boshqasiga jinoyatchi xavf solayotgani aytiladi. Yana kimdir adashib yoki soxta chaqiruv bilan murojaat qiladi. Demakki, Navbatchilik qismi xodimlaridan xushmuomalalik, tezkorlik bilan birga, bosiqlik ham talab etiladi.

Asabi tarang fuqaro quyushqondan chiqib gapirsa ham, navbatchi xodim oʻta bosiqlik bilan javob qaytarsa, maqsadga muvofiq. Lavhamiz qahramoni bularga qatʼiy rioya qilganligi bois fuqarolar ishonchini oqlayapti.

Mayor F.Negov umri davomida yaxshi odamlar va ustozlar qurshovida boʻldi. Ayniqsa, podpolkovnik Nodir Karimovdan kasbning sir-sinoati, baland-pasti, nozik jihatlarini qunt bilan oʻrgandi.

Uning gʻamxoʻrligi va talabchanligi tufayli bugun malakali mutaxassis degan nomga musharraf boʻldi. Qolaversa, oʻnga yaqin shogirdlar tarbiyaladi. Bugun ularning har biri malakali xodim sifatida xizmat qilyapti, osoyishtalikni asrashga munosib hissa qoʻshyapti.

Shuningdek, Firuzjon Negov sportga oshno tutingan xodimlardan biri sifatida har yili huquqni muhofaza qiluvchi idoralar oʻrtasida oʻtkazilayotgan milliy kurash va sambo boʻyicha musobaqalarda faol qatnashib kelmoqda.

U oila aʼzolarini ham sportga jalb qilgan. Oʻtgan yili viloyat ichki ishlar organlari xodimlari va ularning oila aʼzolari ishtirokida oʻtkazilgan “Otam, onam va men — sportchilar oilasi” shiori ostidagi sport musobaqasida mutlaq gʻolib boʻlishgan edi.

Shu yili 16-may kuni viloyat miqyosida 35 yoshdan kattalar oʻrtasida boʻlib oʻtgan milliy kurash musobaqasida lavhamiz qahramoni 90 kilogramm vazn toifasida birinchi oʻrinni egalladi hamda Termiz shahrida oʻtkaziladigan respublika chempionatida qatnashish yoʻllanmasini qoʻlga kiritdi. Biz unga omad tilab qolamiz.

©️ “Postda” gazetasi, Mirzoqul Ahadov, Buxoro viloyati.