Buxoro viloyati IIB boshligʻi polkovnik Mirjamol Miralimov boshchiligida “Psixologik va sotsiologik xizmat koʻrsatish” ilmiy-tadqiqot markazi faoliyatini raqamlashtirish masalasi muhokama qilindi
2024-02-13 09:00:00 / Yangiliklar
Avval xabar berganimizdek, Buxoro viloyati Ichki ishlar boshqarmasi hamda Buxoro davlat universiteti oʻrtasida “Voyaga yetmaganlar, yoshlar va xotin-qizlar orasida jinoyat hamda huquqbuzarliklarni oldini olishga qaratilgan chora-tadbirlar” xususida imzolangan oʻzaro hamkorlik memorandumiga koʻra “Psixologik va sotsiologik xizmat koʻrsatish” ilmiy-tadqiqot markazi tashkil etilgan edi.
Oʻtgan davr mobaynida ushbu markaz tomonidan voyaga yetmaganlar va xotin-qizlar oʻrtasida jinoyatchilikni oldini olish maqsadida hamkorlikdagi keng qamrovli profilaktik chora-tadbirlar amalga oshirildi.
Jumladan, tashkil etilgan ishchi guruh aʼzolari tomonidan viloyat hududi boʻylab muqaddam sudlangan, profilaktik hamda probatsiya hisoblarida turgan xotin-qizlar, yoshlar va voyaga yetmaganlarga huquqiy, ijtimoiy-psixologik yordam koʻrsatish ishlari olib borildi.
Voyaga yetmaganlar va yoshlar, shuningdek, ayollar oʻrtasida sodir etilayotgan jinoyatlarning sabab-oqibatlarini ilmiy-amaliy tadqiq etilib, jinoyatlarni keltirib chiqaruvchi omillar sotsial-psixologik jihatdan birma-bir oʻrganildi.
Shuningdek, voyaga yetmaganlar, xotin-qizlar bilan turli uchrashuvlar tashkil etilib, malakali psixolog mutaxassislar tomonidan har bir toifadagi shaxs bilan individual suhbatlar olib borildi. Sodir etilgan jinoyatlar va ularning sabab-oqibatlari batafsil tahlil qilinib, har bir shaxsga malakali mutaxassislar tomonidan ijtimoiy-psixologik xizmatlar koʻrsatildi.
Bugungi axborot texnologiyalari asrida har bir soha rivoji raqamli texnologiyalar bilan oʻlchanadi.
Shundan kelib chiqib, Buxoro davlat universiteti bilan hamkorlikda, universitet mutaxassis xodimlari imkoniyatlaridan foydalangan holda “Tahliliy tadqiqot” markazining faoliyatini raqamlashtirish, yaʼni elektron platforma yaratiladi.
Bugun, 12-fevral kuni Buxoro davlat universitetida oʻtkazilgan yigʻilishda ushbu elektron platformaning ishlash mexanizmlari muhokama qilindi.
Yigʻilishda Buxoro viloyati Ichki ishlar boshqarmasi boshligʻi polkovnik Mirjamol Miralimov, Buxoro davlat universiteti rektori Obidjon Hamidov, IIB boshligʻi oʻrinbosarlari, tegishli sohaviy xizmatlar rahbarlari hamda professor oʻqituvchilar ishtirok etishdi.
Soʻzga chiqqanlar faoliyati yoʻlga qoʻyilayotgan yangi elektron platformaning afzalliklari, ishlash mexanizmlari xususida maʼlumotlar taqdim etishdi.
Boshqarma boshligʻi “Tahliliy tadqiqot” markazining faoliyatini raqamlashtirish borasida oʻzining tegishli tavsiyalari berib, ushbu tizimni tez fursatda ishga tushirish kerakligi borasida manzillari aniq topshiriqlar berdi.
Yakunda kelgusida amalga oshiriladigan dolzarb vazifalar belgilab olindi.
Buxoro viloyati IIB Axborot xizmati