Respublika ishchi guruhining Buxoro viloyatida aholi murojaatlari yechimiga doir ommaviy sayyor qabullari davom etmoqda
2025-05-29 07:05:00 / Yangiliklar
Jamiyatda inson manfaatlarini ustuvor deb bilish va fuqarolar murojaatlariga oʻz vaqtida hamda samarali javob qaytarishni taʼminlash maqsadida Respublika ishchi guruhi tomonidan tasdiqlangan grafik asosida Buxoro viloyatining barcha shahar va tumanlarida ommaviy sayyor qabullar tashkil etilmoqda.
Joriy yilning 26-mayidan 30-mayiga qadar oʻtkazilishi rejalashtirilgan mazkur tadbirlarning navbatdagisi 28-may kuni Vobkent tumanida joylashgan “Porloq kelajak“ bolalar yozgi oromgohida boʻlib oʻtdi.
Qabulda Ichki ishlar vazirligi hamda Buxoro viloyati Ichki ishlar boshqarmasi rahbariyati ham ishtirok etib, Vobkent, Gʻijduvon va Shofirkon tumanlaridan kelgan 20 dan ortiq fuqarolarning sud-huquq sohasi va ichki ishlar organlari faoliyati bilan bogʻliq masalalari atroflicha koʻrib chiqildi.
Murojaatlarning joyida hal etilishiga alohida eʼtibor qaratilib, qoʻshimcha oʻrganish va huquqiy baho berishni talab etuvchi masalalar yuzasidan tegishli sohaviy xizmat masʼullariga aniq vazifalar yuklatilib, alohida nazoratga olindi.
Aholi bilan doimiy muloqotni taʼminlash, ularning huquq va qonuniy manfaatlarini amaliy roʻyobga chiqarish, joylardagi muammolarni tezkor hal etish — ushbu sayyor qabullarning ustuvor yoʻnalishlaridan biridir.
Eslatib oʻtamiz, sayyor qabullar viloyatning boshqa tumanlarida ham tashkil etiladi.
Buxoro viloyati IIB Axborot xizmati