IIV akademiyasida bitiruvoldi “Final” kompleks oʻquv mashgʻulotlari oʻtkazildi
2025-05-28 21:50:00 / Yangiliklar
Mashgʻulotlar qasddan badanga ogʻir shikast yetkazish, giyohvandlik vositalari yoki psixotrop moddalar bilan noqonuniy muomala qilish, kibermakonda sodir etilayotgan firibgarliklar hamda amaliyotda koʻp uchrayotgan boshqa jinoyatlar boʻyicha tashkil etildi.
Oʻn kun davomida kursantlar oʻquv tezkor-tergov guruhlariga boʻlingan holda jinoyat sodir etilgandan sud jarayonigacha boʻlgan protsessual harakatlarni mustaqil ravishda bajardilar. Mashgʻulotlar professor-oʻqituvchilar bilan birga, tajribali amaliyot xodimlari tomonidan baholab borildi.
– “Final” mashgʻulotlarining bitiruvchilar uchun foydali jihatlari koʻp. Mashgʻulotlar jarayonida huquqbuzarliklarni toʻgʻri malakalash, mustaqil va maqbul qarorlar qabul qilish, nostandart vaziyatlarda oʻzini boshqara olish koʻnikmalari shakllanadi. Bu esa yosh kadrlarning xizmatga qisqa fursatda moslashishida muhim ahamiyat kasb etadi, – deydi Tergov-kriminalistika fakulteti boshligʻi, polkovnik Dilshod Payziyev.
Bir soʻz bilan aytganda, oʻquv mashgʻulotlari masʼuliyatli faoliyat oldida turgan kursantlar uchun oʻziga xos sinov vazifasini oʻtadi. Puxta bilim va amaliy koʻnikma esa muvaffaqiyat omilidir.
IIV akademiyasi Axborot xizmati