Qaror va ijro. Xavfsiz muhit yaratiladi
2025-05-27 23:00:00 / Yangiliklar
Namangan shahar IIB Qoʻriqlash boʻlimi tomonidan mahallalar, jamoat joylari va yashash xonadonlarida xavfsiz muhit yaratish, fuqarolar hayoti, sogʻligʻi va mol-mulkiga har qanday tajovuzlarning oldini olish maqsadida huquqbuzarliklar profilaktikasiga zamonaviy raqamli texnologiyalar va texnik vositalar keng joriy etilmoqda.
Xususan, shahar hududida 64 ta xalq xoʻjaligi obyekti, 700 dan ortiq fuqaro xonadonlari hamda 33 ta koʻp qavatli uylarning kirish yoʻlaklari “Tashvish tugma”lari bilan jihozlanib, texnik qoʻriqlov-ga olindi.
Shuningdek, hududda faoliyat koʻrsatayotgan savdo va maishiy xizmat koʻrsatish shoxobchalariga “Hudud kamera nazorati ostida”, “Obyekt qoʻriqlovda” va “Xonadon qoʻriqlovda” kabi stikerlar yopishtirib chiqilmoqda.
Kriminogen vaziyati ogʻir hududlarga qoʻriqlash xizmati tezkor harakatlanuvchi guruhining avto hamda motopatrullari tomonidan “Qizil nuqta” boʻyicha xizmat tashkil etilayotganini alohida eʼtirof etish joiz.
Yaʼni, aholi gavjum joylar, bozorlar, masjidlar, supermarketlar, yirik savdo markazlarida tashkil etilgan maxsus patrullik xizmati xodimlari shubha uygʻotgan shaxslarning kimligiga oydinlik kiritmoqda.
Bu yoʻnalishdagi ishlarimiz natijasida huquqbuzarliklarni aniqlash imkoni yaratilmoqda.
©️ “Postda” gazetasi, Bekzod Mahmudjonov, Namangan shahar IIB Qoʻriqlash boʻlimi boshligʻi oʻrinbosari, mayor.