Oʻzbekiston Respublikasi Ichki ishlar vazirligining ixtisoslashtirilgan maktab-internatida “Ilm – eng buyuk sharaf” shiori ostida “Soʻnggi qoʻngʻiroq” tadbiri boʻlib oʻtdi
2025-05-26 07:55:00 / Yangiliklar
Tadbir avvalida Oʻzbekiston Respublikasi davlat madhiyasi yangradi. Maktab-internat direktori tadbirni ochib berdi hamda barcha ishtirokchilarni qutlab, bugungi kunning ahamiyati va yoshlarga bildirilayotgan ishonch, ulkan masʼuliyat haqida toʻxtaldi.
Shuningdek 2024/2025-oʻquv yilida 49 nafar bitiruvchining 39 nafari ingliz tilini bilish darajasi boʻyicha, 10 nafari “Bir million dasturchi” loyihasi boʻyicha, shuningdek, matematika va fizika fanidan milliy sertifikatlarni qoʻlga kiritganini hamda 1 nafar oʻquvchi Xalqaro IMAS olimpiadasining bronza medali sohibi boʻlganligini eʼtirof etdi.
Tadbirda, shuningdek, bir guruh faxriylar va Ichki ishlar vazirligi Maʼnaviy-maʼrifiy ishlar va kadrlar bilan taʼminlash departamenti boshligʻining oʻrinbosari ham ishtirok etib, Prezidentimizning maktab bitiruvchilariga yoʻllagan tabrigini oʻqib eshittirdi.
Bitiruv marosimida oʻquvchilar ham soʻz olib, taʼlim-tarbiya bergan ustozlari, ota-onalari ishonchlarini oqlashga, yurt ravnaqiga hissa qoʻsha oladigan, Vatanga va xalqqa sadoqat bilan xizmat qiladigan avlod boʻlishga vaʼda berishdi. Tadbirda oʻquv yili davomida namunali xulqi, aʼlo baholari bilan barchaga oʻrnak boʻlgan va turli xalqaro sertifikatlarni qoʻlga kiritgan iqtidorli bitiruvchilar va ularning ota-onalariga tashakkurnomalar taqdim etildi. Shuningdek, toʻrt nafar bitiruvchi Ichki ishlar vazirining “Oʻqishdagi muvaffaqiyatlari uchun” koʻkrak nishoni bilan taqdirlandi. Tadbir davomida badiiy chiqishlar namoyish etildi, ilm-maʼrifat, vatanparvarlik va fidoyilik ruhidagi sheʼrlar va qoʻshiqlar yangradi.