Jizzax ichki ishlar boshqarmasiga biriktirilgan maktabda “Soʻnggi qoʻngʻiroq” yangradi
2025-05-24 18:00:00 / Yangiliklar
Mamlakatimizning boshqa oʻquv muassasalarida boʻlgani kabi Jizzax viloyatining Sharof Rashidov tumanidagi 12- sonli maktabda ham bugun “Soʻnggi qoʻngʻiroq” tadbiri “Ilm eng buyuk sharaf” shiori ostida oʻtkazildi. Maʼlumot oʻrnida aytish kerak, ushbu oʻquv dargohi Jizzax viloyati ichki ishlar boshqarmasiga biriktirilgan.
Shu maʼnoda boshqarma boshligʻi mazkur tadbirda hozir boʻldi va tantana ishtirokchilariga davlatimiz rahbarining bitiruvchilarga yoʻllagan tabrigini oʻqib, eshittirdi.
Soʻng oʻquvchilari fan olimpiadalari, sport musobaqalari hamda xorijiy tillarni oʻrganish borasida yuqori natijalarga erishgan muallimlar mehnati eʼtirof etilib, ularning 14 nafariga faxriy yorliqlar topshirildi.
Shuningdek, pensiya yoshiga etgan 4 nafar oʻqituvchiga esdalik sovgʻalari berildi. Oʻz navbatida, bilim olish borasida tengdoshlariga oʻrnak boʻlgan oʻquvchi va bitiruvchilar ragʻbatlantirildi.
Tadbir davomida oʻquvchilar tomonidan namoyish etilgan “Xayr maktabim!” badiiy kompozitsion dasturi yigʻilganlar koʻngliga iliqlik baxsh etdi.
Nihoyat, 2025 oʻquv yili nihoyalanganligini sezdirgan, bitiruvchilarni oliy oʻquv yurtlarida ilm choʻqqilarini zabt etishga, kasb-hunar egallashga undovchi qoʻngʻiroq yangradi.
Kezi kelganda aytish kerak, bugungacha viloyat ichki ishlar boshqarmasi koʻmagida maktabdagi yoʻl harakati qoidalari sinfi koʻrgazmali qurollar, yoʻl belgilari, maketlar, televizor va boshqa elektron vositalar bilan jihozlandi.
Xuddi shunday, maktab hovlisida zamon talablariga mos yoʻl harakati maydonchasi yuzaga keltirildi.
Ana shu tarzda chaqiriqqa qadar boshlangʻich tayyorgarlik xonasi ham harbiy xizmatga oid oʻquv qurollari va koʻrgazmali vositalar bilan taʼminlandi.
Saf hamda vorkaut maydoni foydalanishga topshirildi.
Shuningdek, sport zali taʼmirdan chiqarilib, Ichki ishlar vazirligi tomonidan oʻquvchilarga 22 turdagi 132 ta sport anjomlari topshirildi.
Qolaversa, kutubxona va oʻquv zalini bunyodga keltirish maqsadida rekonstruksiya va taʼmir ishlari bajarilmoqda.
Mos ravishda ushbu kutubxonaga ming dona badiiy adabiyotlar olindi.
Bundan tashqari, oqova tarmogʻi ishga tushirildi. Maktabning tevaragiga 196 metr uzunlikda beton devorlar oʻrnatilib, mavjud devorlar taʼmirlanayotir.
Yozgi taʼtil davomida binoning ichki qismi taʼmirlanadi. Xuddi shunday, xavfsizlikni taʼminlashga oid tadbirlar amalga oshiriladi.
Qisqasi, otaliqqa olingan maktabda taʼlim sharoitlarini yaxshilashga qaratilgan ishlar davom etadi.
Jizzax viloyati IIB Axborot xizmati