O‘zbеkiston Rеspublikаsi Ichki ishlаr vаzirligi

Har qanday jamiyatning taraqqiyoti uning fidoyi aʼzolariga bogʻliq. Ichki ishlar organlari xizmati ham xodimlardan fidoyilikni talab qiladi. Busiz el-yurt tinchlik-osoyishtaligini taʼminlash mushkul. Huquq-tartibot posbonlari oʻz vazifalarini bajarish yoʻlida sogʻliqlarini, kerak boʻlsa, hayotlarini tikadilar.

Navoiy viloyati ichki ishlar organlarida xizmat qilish chogʻida nogironlik orttirgan yoki halok boʻlgan xodimlarning oilalariga doimiy ravishda gʻamxoʻrlik koʻrsatib kelinmoqda. Salomatligi yomonlashganligi tufayli pensiyaga chiqqanlarni viloyat IIB Tibbiyot boʻlimi shifokorlari vaqti-vaqti bilan chuqurlashtirilgan tibbiy koʻrikdan oʻtkazib, zarur hollarda bepul dori-darmon bilan taʼminlashadi.

Xizmat vaqtida tan jarohati olib, pensiyaga chiqqan 4 nafar xodimga hamda ularning 14 nafar oila aʼzosiga joriy yilning oʻtgan davri ichida moddiy yordam koʻrsatildi. Bir nafar xodimga asa uy-joyini taʼmirlash uchun foizsiz qarz berildi.

Jarohat olgan va nogiron boʻlib qolgan xodimlarimizga muntazam ravishda nafaqat moddiy, balki maʼnaviy yordam ham koʻrsatib turamiz. Har oyda ishchi guruh aʼzolari ularning holidan xabar olib turishadi, turmush sharoitini oʻrganishadi, — deydi viloyat IIB Maʼnaviy-maʼrifiy ishlar va kadrlar bilan taʼminlash xizmati boshligʻining oʻrinbosari, mayor Toʻymurod Abdullayev.

Qariyb 10-yildan ortiq viloyat IIB JTSB Patrul-post xizmati batalyonida xizmat qilgan Elmirzo Sultonov bir guruh xavfli jinoyatchilarni qoʻlga olish vaqtida boshidan qattiq jarohat oldi. Afsuski, shu tufayli xizmatini davom ettirolmadi. U pensiyaga chiqqach, avvaliga oʻzini jamiyatdan uzilib qolgandek his qildi.

Ammo boshqarma rahbariyatining eʼtibori, gʻamxoʻrligi, hamkasblarining mehri Elmirzoga ruhiy dalda boʻldi. Qolaversa, unga zarur moddiy va tibbiy-ijtimoiy koʻmak koʻrsatilyapti.

Boshqarmada tashkil etiladigan turli madaniy-maʼrifiy tadbirlarga taklif etishadi.

Farzandlarim Gulnoza va Behruzga oliy taʼlim muassasalariga oʻqishga kirishida imtiyozli sertifikat taqdim etishdi. Bundan tashqari, har yili kasaba uyushmasi tomonidan menga bepul davolanishim uchun yoʻllanmalar berishadi. Bu esa biz uchun katta yordam, — deydi isteʼfodagi serjant Elmirzo Sultonov.

Aziz Shomurodov Qiziltepa tumani IIB M va FRB boshligʻi lavozimida samarali xizmat qilayotgan bir paytda ogʻir xastalikka chalindi.

Uning Hindistondagi jarrohlik operatsiyasi xarajatlari viloyat IIB tomonidan toʻlab berildi.

Buning uchun viloyat IIB rahbariyatidan, turmush oʻrtogʻimning hamkasblaridan, qolaversa, qoʻlidan kelgan koʻmagini ayamagan mahalla-koʻydan minnatdormiz. Ularning yordami bilan umr yoʻldoshim shifo topdi, — deydi isteʼfodagi kapitan Aziz Shomurodovning ayoli.

Xizmat vazifasini bajarish vaqtida halok boʻlganlar, jarohat olganlar chinakam fidoyilardir. Fidoyilik esa hamisha qadr topadi.

Zero, insonni qadrlash davlatimiz siyosatining ustuvor yoʻnalishi hisoblanadi.

©️ “Postda” gazetasi, Mahliyo Xolova, Navoiy viloyati.