IIV Akademiyasida “Kriminogen vaziyati ogʻir mahallalarda jinoyatchilikni jilovlash: muammo va yechimlar” mavzusida ilmiy-amaliy konferensiya oʻtkazildi
2025-05-24 09:00:00 / Yangiliklar
Manfaatdor vazirlik va idoralar, huquqni muhofaza qiluvchi organlar, oliy taʼlim va ilmiy-tadqiqot muassasalari vakillari ishtirok etgan tadbir Prezidentimizning “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi qarori ijrosiga bagʻishlandi.
Konferensiya avvalida akademiya boshligʻi Rustam Xatamov nutq soʻzladi.
Keyingi yillarda huquqbuzarliklarning barvaqt oldini olish va jinoyatchilikni jilovlash borasida samarali tizim yaratilgani, xalqimizning osoyishta va xavfsiz hayotini taʼminlash, mahallalarni jinoyatdan holi hududga aylantirishga qaratilgan keng qamrovli chora-tadbirlar ijobiy natija berayotgani, davlatimiz rahbarining qarori tizimdagi islohotlarni sifat jihatdan yangi bosqichga olib chiqqani taʼkidlandi.
Prezidentimiz qarori yurtimizda kechayotgan islohotlarga daxldor har bir yurtdoshimizning masʼuliyatini oshirishga xizmat qilgani bilan gʻoyat muhim ahamiyat kasb etdi. Qaror bilan ustuvor vazifalar va ularni amalga oshirish mexanizmlari aniq belgilab berildi.
Jinoyatchilikni jilovlashga qaratilgan maqsadli chora-tadbirlarni ishlab chiqish va amaliyotga tatbiq etish, mahallalarning kriminogen vaziyatini doimiy ravishda muhokama qilib borish, muammolarni joyida hal qilish tizimi yoʻlga qoʻyildi.
Bu esa oʻzining ijobiy natijasini koʻrsatmoqda, – dedi Oliy Majlis Senatining Mudofaa va xavfsizlik masalalari qoʻmitasi raisi Qutbiddin Burxonov.
Tadbirda, shuningdek, “Xavfsiz shahar” tizimlarini rivojlantirish markazi direktori U. Kulanov, Kriminologiya tadqiqot instituti boshligʻi oʻrinbosari A. Shuhrat, Jamoat xavfsizligi universiteti boshligʻi oʻrinbosari Sh. Zulfiqorov, IIV akademiyasi boshligʻi oʻrinbosari T. Kuchkarov va boshqalar soʻzga chiqdi.
Mahallalarda huquqbuzarliklarning asl omillarini oʻrganish va kriminogen vaziyatni barqarorlashtirish borasida amalga oshirilayotgan ishlar, amaliyotga tatbiq qilingan yangicha yondashuv va tajribalar, oʻtgan davr mobaynida erishilgan natijalar hamda kelgusidagi ustuvor vazifalar atroflicha muhokama qilindi.
Konferensiya yakunlari boʻyicha ishlab chiqilgan taklif va tavsiyalar huquqbuzarliklarning barvaqt oldini olish orqali mahallalarda obod va xavfsiz muhitni qaror toptirishga, jamiyat farovonligini oshirishga xizmat qilishi taʼkidlab oʻtildi.
IIV Akademiyasi Axborot xizmati