O‘zbеkiston Rеspublikаsi Ichki ishlаr vаzirligi

Xalqimizda «Qoʻshning tinch — sen tinch», degan maqol bor. Bu hikmatning mazmuni kundek ravshan, munozaraga oʻrin yoʻqdek koʻrinadi. Lekin «Qoʻshning tinch boʻlmogʻi uchun oʻzing nima qilishing kerak?» degan savol qoʻyilsa, odam oʻylanib qoladi...

1977-yilda tugʻilgan Sh.Ismoilova va 1980-yilda tugʻilgan M.Alimova Bektemir tumani «Iqbol» mahallasida ancha yillardan buyon qoʻshni boʻlib yashab keladi. Ular tirikchilik maqsadida xususiy klinika darvozasi yonida mayda-chuyda sotib oʻtirardi. Baʼzan joy, baʼzan xaridor talashib-tortishib qoladigan boʻldi. Oxir-oqibat arzimagan vaj, bahona bilan ham bir-birini haqorat qiladigan darajaga borib yetishadi.

Ayollar oʻrtasidagi mushtlashuv ichki ishlar organi xodimlari aralashuvi bilan yakun topadi...

- Biz har ikki ayol bilan profilaktik suhbat oʻtkazdik. Yomon qoʻshnidan qutulishning yoʻllaridan biri — har bir odamning oʻzi yaxshi boʻlishga harakat qilishi kerakligi, yaʼni birovga qilinajak yomonlik ham, yaxshilik ham qoʻshnidan boshlanishini misollar orqali tushuntirishga harakat qildik, — deydi Bektemir tumani IIOFMB 2-sonli IIB HPB xotin-qizlar masalalari boʻyicha katta inspektori, kapitan Sobira Rahmonova. — Qolaversa, ayol kishi jamoat oldida oʻzini bunday betartib tutishi bilan, avvalo, oʻzining shaʼni va qadr-qimmatini toptasa, qolaversa, qonun oldida ham javobgarlikka tortilishi haqida ogohlantirildi. Har ikki ayol ham xatolarini tushunib yetishdi va bir-biridan uzr soʻrab, kelishib olishdi.

Kapitan Sobira Rahmonova xizmat faoliyatida bu kabi misollarni koʻplab keltirish mumkin. 2020-yildan Bektemir tumani IIOFMB 2-sonli IIB HPB xotin-qizlar masalalari boʻyicha katta inspektori vazifasida ishlab kelmoqda. U «Iqbol», «Chashma», «Gulbogʻ», Abay nomli mahalla fuqarolar yigʻiniga xizmat koʻrsatadi. Maktab bilan ham hamkorlikni toʻliq yoʻlga qoʻya olgan. Voyaga yetmagan qizlar bilan alohida shugʻullanadi. Ularning davomatlarini doimiy nazoratda ushlashga harakat qiladi.

Lavhamiz qahramoni 2021-yilda «Yil ayoli» milliy tanlovining tumanlararo bosqichida qatnashib, «Yilning eng vatanparvar ayoli» nominatsiyasi boʻyicha taqdirlangan. «Yosh kitobxon», «Zukko kitobxon», «Fidoyi ayol», «Konstitutsiya bilimdoni», «Zakovat» kabi bir qancha koʻrik-tanlovlarda qatnashib, doimo faxrli oʻrinlarni qoʻlga kiritib keladi. Bundan tashqari, shaxmat, shashka, voleybol kabi sport musobaqalarida ishtirok etib, oʻz iqtidorini namoyon etib kelmoqda.

Lavhamiz qahramoni ishdan ajralmagan holda, Jurnalistika va ommaviy kommunikatsiyalar universitetining 3-kursida tahsil olmoqda.

Adolat Fayziyeva, oʻz muxbirimiz. “Postda”
Toshkent shahri