Buxoro viloyatida xizmat intizomi va qonunchilikka rioya masalalari muhokama qilindi
2025-05-20 15:10:00 / Yangiliklar
19-may kuni Buxoro viloyati Ichki ishlar boshqarmasida xizmat va ijro intizomini mustahkamlash, qonunchilik talablariga qatʼiy rioya etilishini taʼminlashga bagʻishlangan kengaytirilgan yigʻilish boʻlib oʻtdi. Unda boshqarma rahbariyati, barcha sohaviy xizmatlar va hududiy IIBlar shaxsiy tarkibi videokonferensaloqa orqali ishtirok etdi.
Yigʻilish davlat madhiyasi bilan boshlandi va “Yurtim tarixini oʻrganaman” mavzusida maʼnaviyat mashgʻuloti bilan davom etdi. Shundan soʻng quyidagi yoʻnalishlar yuzasidan hisobotlar tinglanib, tanqidiy tahlillar oʻtkazildi:
- 4 oy 18 kunlik jinoyatchilik holati tahlili;
- “Xavfsiz va sogʻlom yurt”, “Qoradori-2025” va “Nazorat” profilaktik tadbirlari natijalari;
- Jinoyatlarning ochilishi, qidiruvdagi shaxslarni aniqlash, tergov va surishtiruv sifatini oshirish;
- Murojaatlar bilan ishlash va “E-material” tizimi orqali kelib tushgan maʼlumotlar ustidan nazorat;
- Oila-turmush doirasidagi jinoyatlarning oldini olish, yoshlar va xotin-qizlar oʻrtasida huquqbuzarliklarni kamaytirish;
- Taʼlim muassasalarida “Davomat” va “Tigʻ” tadbirlarini kuchaytirish;
- Oʻta ogʻir jinoyatlarning profilaktikasi;
- Mahallalarda xavfsizlikni taʼminlash boʻyicha Prezident qarorlari ijrosi;
- Raqamli transformatsiya va axborot texnologiyalari yordamida jinoyatlarga qarshi kurash;
- Qoʻriqlash xizmatining samaradorligini oshirish;
- Soʻnggi qoʻngʻiroq tadbirlariga tayyorgarlik va xavfsizlikni taʼminlash;
- Fuqarolar huquqiy savodxonligini oshirish va sayyor qabullar orqali muammolarni hal etish.
Shuningdek, “Edo.ijro.uz” va “Doc.iiv.uz” platformalaridagi tizimli kamchiliklar muhokama qilindi.
Yigʻilish yakunida xizmat burchiga sadoqat bilan yondashgan xodimlar ragʻbatlantirilib, pul mukofotlari va sovgʻalar bilan taqdirlandi. Ichki ishlar vaziri tomonidan 18-may kuni berilgan topshiriqlar shaxsiy tarkibga yetkazilib, ijrosi qatʼiy nazoratga olindi.
Buxoro viloyati IIB Axborot xizmati