Vazir oʻrinbosari polkovnik Zufar Kurbanov Jizzax viloyatiga tashrif buyurdi
2024-02-06 14:10:00 / Yangiliklar
Oʻzbekiston Respublikasi Ichki ishlar vaziri oʻrinbosari, polkovnik Zufar Kurbanov Jizzax viloyatida jinoyatchilikning ahvoli, bu borada belgilangan vazifalar va tizim xodimlarining mazkur yoʻnalishda olib borayotgan ishlarini oʻrganmoqda.
Dastlab viloyat ichki ishlar boshqarmasi axborot xizmati faoliyati bilan tanishdi. Shuningdek, “102” avtomatlashtirilgan maʼlumotlar tizimi, boshqarma qoshidagi tezkor qidiruv xizmati kiberxavfsizlik boʻlinmasi hamda tarixiy muzeyini ham koʻzdan kechirdi.
Qayd etish lozimki, “102” avtomatlashtirilgan maʼlumotlar tizimiga qilingan har qanday qoʻngʻiroq bugungi kunda hududiy ichki ishlar boʻlimlari navbatchilik qismlari tomonidan emas, balki, viloyat ichki ishlar boshqarmasidagi mazkur tizimi orqali qabul qilinadi.
Zamonaviy aloqa va axborot qurilmalari bilan taʼminlangan tizimda har bir murojaat roʻyxatga olinib, tegishliligi boʻyicha hududiy ichki ishlar organlarining navbatchilik qismlariga yetkaziladi. Bu oʻz oʻrnida tezkor tergov guruhining voqea joyiga qisqa muddatda etib borishi, jinoyatlarni issiq izidan fosh qilish yoki sodir etilishi mumkin boʻlgan qonunbuzarliklarning oldini olish imkonini beradi.
Oʻzbekiston Respublikasi Ichki ishlar vaziri oʻrinbosari Jizzax viloyatida jinoyat va huquqbuzarliklarning oldini olish, fuqarolarning xavfsizligini taʼminlash, odamlarning munosib turmush kechirishi uchun zarur sharoitlarni yaratish, hududlarda kriminogen vaziyatni yaxshilash borasidagi oʻrganishlari davom etmoqda.
Jizzax viloyati IIB Axborot xizmati