18-may — “Xalqaro muzeylar kuni“. IIV tarixi muzeyi – yosh avlodda vatanparvarlik tuygʻusini shakllantirayotgan maʼnaviy maskan
2025-05-18 09:00:00 / Yangiliklar
Muzeylar ajdodlardan meros boʻlgan madaniy boyliklarni, tarixiy xotiralarni kelajak avlodga yetkazib beradigan ilmiy, maʼnaviy-maʼrifiy xazina.
Ichki ishlar vazirligining “Ichki ishlar organlari tarixi” muzeyiga tashrif buyurgan har bir inson nafaqat tizim tarixi va faoliyati, balki el-yurt tinchligi va fuqarolar xavfsizligini taʼminlash yoʻlida amalga oshirilgan ishlar, sohada olib borilayotgan islohotlar, bu borada oʻrnak koʻrsatgan ichki ishlar organlari xodimlarining sharafli faoliyati bilan ham yaqindan tanishadi.
Joriy yilning 5 oyi davomida, muzeyga 1200 nafardan ortiq tashrifchilar, jumladan, Toshkent shahri va viloyatidagi taʼlim muassasalari oʻquvchi va talabalar, ichki ishlar organlari rahbarlariga biriktirilgan yoshlar, shuningdek, muzey joylashgan “JAR” sport-sogʻlomlashtirish kompleksida oʻtkazilayotgan turli xalqaro musobaqalarda ishtirok etish uchun qoʻshni respublikalaridan kelgan yuzlab sportchi yoshlar tashrif buyurdilar.
Xususan, Ichki ishlar vazirining tegishli farmoyishiga asosan aprel oyi davomida barcha ichki ishlar organlarida oʻtkazilgan “Maʼnaviyat oyligi” doirasida muzeyga tashrif buyurgan xodimlar va IIV Akademiyasi kursantlari soni 700 nafardan oshdi.
Tashrifchilarga ichki ishlar organlari tarixi, ichki ishlar organlarining el-yurt osoyishtaligini taʼminlash va jinoyatchilikka qarshi kurashish sohasidagi faoliyati, bu yoʻlda samarali xizmat qilgan xodimlarning ibratli hayoti, soʻnggi yillarda tizimda amalga oshirilgan islohotlar haqida batafsil maʼlumot berilmoqda.
Bu kabi tashriflar yoshlarni vatanparvarlik ruhida tarbiyalashga, ularning yurtimiz tarixiga boʻlgan muhabbatini yanada oshirishga, kelajakda xalqimizga sadoqat bilan xizmat qiladigan mard va jasur xodimlarni shakllantirishga xizmat qiladi.
Muzey ekspozitsiyasini yanada boyitish maqsadida yaqinda “JAR” Sport sogʻlomlashtirish kompleksi rahbariyati tashabbusi bilan muzey hovlisida namoyishga qoʻyilgan turli yillarda xizmatda foydalanilgan “Moskvich-412”, “GAZ-M-21”, “GAZ-24” (Volga), “VAZ 21013” (Jiguli), “VAZ-2121” (Niva) avtomobillari qatoriga “Dogan”, “Daewoo Nexia-1” va “Lacetti” avtomobillari ham qoʻshildi.
Tegishli jihozlar va belgilar bilan bezatilgan ushbu avtomobillar tashrifchilar, ayniqsa, yoshlarning qiziqishiga sabab boʻlmoqda.