IIV Akademiyasida yoʻllarda harakat xavfsizligini taʼminlashning bugungi holati, mavjud muammolar va ularning yechimlariga bagʻishlangan ilmiy-amaliy anjuman boʻlib oʻtdi
2025-05-18 09:00:00 / Yangiliklar
Manfaatdor vazirlik va tashkilotlar vakillari, olimlar, soha mutaxassislari ishtirok etgan tadbirda ayni sohada amalga oshirilayotgan islohotlar, amaliyotga tatbiq etilayotgan ilgʻor yondashuvlar hamda istiqboldagi vazifalar yuzasidan fikr almashildi.
Konferensiyada IIV akademiyasi boshligʻi oʻrinbosari R. Nigmatov, Jamoat xavfsizligi departamenti YHXX boshligʻi Sh, Ibragimov, Respublika sud ekspertizasi markazi laboratoriya mudiri Q. Umidillayev, Transport vazirligi huzuridagi Avtomobil yoʻllari qoʻmitasi bosh mutaxassisi D. Musayev, Toshkent davlat transport universiteti kafedra mudiri A. Nazarov, Huquqni muhofaza qilish akademiyasi katta prokurori O. Kim va boshqalar soʻzga chiqdi.
“Yoʻl harakati xavfsizligini taʼminlashning ustuvor yoʻnalishlari”, “Yoʻl harakati xavfsizligi sohasidagi muammolar boʻyicha istiqboldagi chora-tadbirlar”, “Yoʻl-transport hodisalarida sud ekspertizasining zamonaviy imkoniyatlari”, “Yoʻl xoʻjaligini rivojlantirish istiqbollari”, “Avtomobil yoʻllarida harakat xavfsizligini taʼminlash muammolari: ilmiy-amaliy yechimlar”, “Malakali haydovchilarni tayyorlash – davr talabi” mavzularida maʼruzalar tinglandi.
Soha mutaxassislari tizimdagi muammolarga eʼtibor qaratib, yoʻl infratuzilmasini yaxshilash, yoʻl-transport hodisalarini kamaytirish, huquqbuzarliklarning asl omillarini ilmiy jihatdan oʻrganish, harakat ishtirokchilarining madaniyatini yuksaltirish, sohaga raqamli texnologiyalarni joriy qilish borasida taklif hamda tavsiyalarini bildirib oʻtdilar.
Konferensiya doirasida ishtirokchilar maxsus texnika va vositalar koʻrgazmasi bilan ham tanishdilar.
IIV Akademiyasi Axborot xizmati