Navoiy viloyat huquqni muhofaza qiluvchi organ vakillari Navoiy shahridagi oʻrganishlari davomida yoshlar bilan uchrashdi
2025-05-18 09:00:00 / Yangiliklar
Hududlarda kriminogen vaziyatni yaxshilash, ayniqsa yoshlar ishtirokida sodir etilayotgan jinoyat va huquqbuzarliklarning barvaqt oldini olishga qaratilgan navbatdagi nazorat va reyd tadbirlari oldidan kuch tuzilmalari vakillari ishtirokida yoʻriqnoma tashkil etildi.
Unda viloyat Prokurori, Ichki ishlar hamda Milliy gvardiya boshqarmasi boshliqlari tomonidan shahar hududini jinoyatchilikdan holi hududga aylantirish, bunda nazoratni kuchaytirish, fuqarolar bilan targʻibot-tashviqot ishlarini amalga oshirish, qonunbuzarlarga murosasiz boʻlish yuzasidan topshiriqlar berildi.
Yoʻriqnomadan soʻng viloyat huquqni muhofaza qiluvchi organlar rahbarlari shaharning aholi gavjum va tungi vaqtda faoliyat koʻrsatuvchi maishiy xizmat koʻrsatish joylarini koʻzdan kechirib, jamoat tartibini saqlashga masʼul xodimlar bilan suhbatlashdi.
Mutasaddilar shaharda mavjud oliy taʼlim muassasalari, talabalar turar joylari hamda ijara uylarida boʻlishib, ular uchun yaratilgan sharoitlar bilan tanishdi.
Talaba-yoshlarning boʻsh vaqtlarini mazmunli tashkil etish, sportga jalb etish orqali jinoyat va huquqbuzarliklarning sababchisi va jabrlanuvchisi boʻlib qolishidan saqlash taʼkidlandi.
Bu borada masʼullarga tegishli koʻrsatma va topshiriqlar berildi.
Navoiy viloyati IIB Axborot xizmati