Sirdaryo viloyati boʻylab “Payshanba profilaktik kuni“ munosabati bilan joylarga bir qator profilaktik tadbirlar amalga oshirildi
2025-05-16 17:20:00 / Yangiliklar
“2025-yilda Respublika mahallarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida“gi PQ-1-son qarorini ijrosini yuzasidan Sirdaryo viloyati prokuraturasida muhokama yigʻilishi boʻlib oʻtdi.
Mazkur yigʻilishda mahallada huquqbuzarlik va jinoyatning oldini olish borasidagi koʻrilgan xavfsizlik chora-tadbirlari va mahalla yettiliklarining amalga oshirilgan ishlari atroflicha tahlil qilinib, kelgusida amalga oshirilish lozim boʻlgan ishlar yuzasidan aniq vazifalar belgilab berildi.
Viloyat hududi boʻylab ayollar oʻrtasida jinoyatchilik va huquqbuzarliklarni barvaqt oldini olish borasida ishsiz boʻlgan xotin-qizlar uchun “Mehnat yarmarkasi“ tashkil etildi. Shuningdek xotin-qizlar oʻrtasida kiberjinoyatlarni barvaqt oldini olish yuzasidan kelgusida xotin-qizlar jinoyat va huquqbuzarlikdan jabrlanib qolmasliklarini oldini olish maqsadida ular bilan profilaktik suhbatlar oʻtkazildi.
Boshqarma Jamoat xavfsizligi xizmati Probatsiya boʻlimi tomonidan Probatsiya nazorati ostidagi jazo oʻtayotgan shaxslar uchun sayyor sudlar tashkil etilib, sud tomonidan qoʻyilgan cheklovlarga amal qilmay, jazoni oʻtashdan boʻyin tovlab yurgan shaxslarni jazosi ogʻiriga almashtirilgan boʻlsa, sud tomonidan tayinlagan jazoni oʻtash tartib-qoidalariga rioya qilib, oʻziga toʻgʻri xulosa chiqargan, tuzalish yoʻliga kirgan nazorat ostidagi shaxslar oʻtalmay qolgan jazo muddatidan ilgari shartli ravishda ozod qilindi.
Viloyat Qoʻriqlash boshqarmasi masʼullari hamda mahalla profilaktika inspektorlari bilan birgalikda jinoyatchilikni oldini olish boʻyicha savdo doʻkonlari va xonadonlarni qoʻriqlash pultiga ulatish hamda videokuzatuv kameralarni oʻrnatish boʻyicha aholi oʻrtasida profilaktik ishlar amalga oshirildi.
Bundan tashqari, joylarda profilaktika inspektorlari hamda mahalla vakillari hamkorligida sudlarda nizolashayotgan oilalar bilan profilaktik suhbatlar oʻtkazildi. Ushbu shaxslarga himoya orderlari rasmiylashtirildi va cheklovlari tushuntirildi.
Guliston shahrini obod maskanga aylantirish maqsadida eʼlon qilingan “dolzarb 10 kunlik“ tadbirlari davomida obodonlashtirish qoidalariga amal qilmagan fuqarolarga nisbatan qonuniy tartibda choralar koʻrib kelinmoqda.
Ushbu tadbirlar doirasida Sirdaryo tumani hududida “Diqqat piyoda“ oyligi tadbiri munosabati bilan umumtaʼlim maktabi oʻquvchilari bilan targʻibot tadbiri oʻtkazildi. Targʻibot tadbiri davomida ertamiz kelajagi boʻlgan oʻquvchi yoshlarga piyoda, velosipedda hamda yoʻlovchi sifatida harakatlanish tartibi va meʼyorlari tushuntirib oʻtildi.
Bu kabi tadbirlar viloyat hududi boʻylab samarali tashkil qilib kelinmoqda.
Sirdaryo viloyati IIB Axborot xizmati