Ichki ishlar vazirligining ishchi guruhi tomonidan Qoraqalpogʻiston Respublikasida oʻtkazilgan kompleks inspektorlik tekshiruvi yakunlariga bagʻishlangan yigʻilish boʻlib oʻtdi
2025-05-16 14:50:00 / Yangiliklar
Tadbirda Ichki ishlar vazirligi rahbariyati, Qoraqalpogʻiston Respublikasi hamda tuman va shahar darajasidagi ichki ishlar organlari rahbarlari hamda sohaviy xizmatlarning masʼullari ishtirok etdilar. Yigʻilishda ichki ishlar organlari xizmatining joriy holati, faoliyat samaradorligi, shaxsiy tarkibning kasbiy tayyorgarligi, xizmat intizomi va jamoat xavfsizligini taʼminlash borasidagi ishlar toʻliq tahlil etildi.
Xizmat faoliyatida yuqori natijalarga erishgan, namunali xizmat faoliyati uchun aholi hamda safdoshlari tomonidan alohida eʼtirof etilgan bir guruh xodimlar Ichki ishlar vazirining buyrugʻi bilan munosib mukofotlandilar.
Jumladan, Beruniy tumani IIB profilaktika katta inspektori podpolkovnik Oʻktam Iskandarov va Yoʻl harakati xavfsizligi boshqarmasi inspektori safdor Baxtiyor Niyetov “Aʼlo xizmatlari uchun” koʻkrak nishoni bilan, Boʻzatov tumani IIB boshligʻi polkovnik Umida Kurbanbayeva va birinchi mintaqaviy hudud tezkor vakili polkovnik Bekmurza Bulatov I-darajali “Benuqson xizmatlari uchun” koʻkrak nishoni bilan, shuningdek Amudaryo tumani IIB huzuridagi tergov guruhi katta tergovchisi mayor Maʼmurjon Shamuradov va Qonlikoʻl tumani IIB Tashkiliy boʻlinmasi murojaatlar bilan ishlash guruhi kichik inspektori serjant Sagыnbay Turdыmuradov Ichki ishlar vazirining esdalik qoʻl soati bilan taqdirlandilar.
Majlisda qator sohalarda erishilgan ijobiy natijalar bilan birga, yoʻl qoʻyilgan kamchiliklar va tizimdagi muammolarga ham eʼtibor qaratildi. Tekshiruvi natijalariga koʻra, xizmat faoliyatida jiddiy kamchiliklarga yoʻl qoʻygan bir qator rahbarlarga nisbatan intizomiy taʼsir choralari qoʻllanildi.
Taʼkidlanishicha, mazkur tekshiruv faqat nazorat maqsadida emas, balki tizim faoliyatini takomillashtirish, ichki ishlar organlarini zamonaviy talablarga muvofiq ravishda samaradorligini oshirishga qaratilgan amaliy qadam sifatida xizmat qilmoqda.
Tadbir jarayonida, shuningdek, inspektorlik tekshiruvi natijalariga koʻra, markaziy apparat hamda hududiy boʻlinmalarning moddiy-texnik taʼminotini yaxshilash boʻyicha tegishli chora-tadbirlar belgilandi.
Yigʻilish yakunida masʼullarga xizmat faoliyatini tubdan qayta koʻrib chiqish, jamoaviy masʼuliyatni oshirish hamda fuqarolarning ishonchini mustahkamlashga qaratilgan aniq topshiriqlar berildi va ijrosi nazoratga olindi.